گوہاٹی، 23 نومبر (ہ س)۔

بھارت اور جنوبی افریقہ کے درمیان گوہاٹی کے برساپارا کرکٹ سٹیڈیم میں کھیلے جا رہے دوسرے ٹیسٹ میچ کے دوسرے دن کا کھیل ختم ہو گیا ہے۔ دوسرا دن مکمل طور پر مہمان ٹیم کا رہا، آل راو¿نڈر سینور ن متھوسامی نے 109 رنز کی شاندار سنچری اسکور کی جبکہ مارکو جانسن نے 93 رنز بنائے۔ اس سے جنوبی افریقہ کو اپنی پہلی اننگز میں 489 رنز بنانے میں مدد ملی۔

جواب میں، بھارت نے دن کا کھیل ختم ہونے پر اپنی پہلی اننگز میں بغیر کوئی وکٹ کھوئے 9 رنز بنالئے، وہ جنوبی افریقہ سے 480 رنز سے پیچھے ہے۔ یشسوی جیسوال سات اور کے ایل راہل دو رنز پر ناٹ آؤٹ رہے۔

اس سے قبل اتوار کی صبح، جنوبی افریقہ نے کل (ہفتہ) کے اسکور 247/6 سے دوبارہ کھیل شروع کیا۔ سینور ن متھوسامی اور کائل ویرین نے شاندار بلے بازی کی۔ دونوں بلے بازوں نے دوسرے دن کے پہلے سیشن میں کوئی وکٹ نہیں گنوایا اور ٹیم کا اسکور 300 سے آگے لے گئے۔

چائے کے وقفے کے بعد ہندوستانی اسپنر رویندر جڈیجہ نے کائل ویرائن کو آؤٹ کر کے شراکت داری توڑ دی۔ ویرائن 45 رنز بنا کر آؤٹ ہوئے۔ متھوسامی نے دوسرے سرے سے اپنی اننگز کو جاری رکھا، اپنی پہلی ٹیسٹ سنچری اسکور کی۔ متھوسامی نے مارکو جانسن کے ساتھ شراکت میں اسکور کو 400 سے آگے پہنچا دیا۔

محمد سراج نے متھوسامی کو آؤٹ کرکے ہندوستان کو ایک اہم پیش رفت فراہم کی۔ متھوسامی 206 گیندوں پر 109 رنز بنانے کے بعد آؤٹ ہوئے جس میں 10 چوکے اور دو چھکے شامل تھے۔ فاسٹ باؤلر جسپریت بمر ہ نے سائمن ہارمر کو آؤٹ کر کے ہندوستان کو ان کی نویں وکٹ دلائی۔ سائمن نے پانچ رنز بنائے۔ اس کے بعد کلدیپ یادو نے مارکو جانسن کو آؤٹ کر کے جنوبی افریقہ کی اننگز کا خاتمہ کیا۔ جانسن نے 91 گیندوں پر 93 رنز بنائے جس میں چھ چوکے اور سات چھکے شامل تھے۔ کیشو مہاراج 12 رنز بنا کر ناٹ آؤٹ رہے۔

اس سے قبل ہفتے کے روز ایڈن مارکرم اور ریان رکلٹن نے ٹھوس آغاز فراہم کیا تھا۔ مارکرم نے 38 اور رکلٹن نے 35 رنز بنائے۔ کپتان ٹیمبا باوما 92 گیندوں پر پانچ چوکوں کی مدد سے 41 رنز بنا کر آؤٹ ہوئے۔ اس کے بعد ٹرسٹن اسٹبس نے چار چوکوں اور دو چھکوں کی مدد سے 49 رنز بنائے، ویان مولڈر نے 13 اور ٹونی ڈی جیورجی نے 28 رنز بنائے۔

ہندوستان کی جانب سے اسپنر کلدیپ یادو نے چار جبکہ جسپریت بمراہ، محمد سراج اور رویندر جڈیجہ نے دو دو وکٹیں حاصل کیں۔

جنوبی افریقہ کو دو میچوں کی ٹیسٹ سیریز میں 1-0 کی برتری حاصل ہے۔ کولکاتہ کے ایڈن گارڈنز میں کھیلے گئے پہلے ٹیسٹ میں افریقی ٹیم نے بھارتی ٹیم کو 30 رنز سے شکست دے دی تھی۔

ہندوستھان سماچار

ہندوستان سماچار / عطاءاللہ