حیدرآباد، 2 نومبر(ہ س)۔

مرکزی مملکتی وزیرداخلہ بندی سنجے نے الزام عائد کیا ہے کہ تلنگانہ کے وزیراعلیٰ اے ریونت ریڈی نے اپنی تقریرمیں توہین آمیززبان استعمال کی ہے۔انہوں نے ان سے غیرمشروط معافی کا مطالبہ کیا ہے۔ بی جے پی قائد نے سوشل میڈیا پلیٹ فارم ایکس پر وزیراعلیٰ کے بیان کی مذمت کی جو انہوں نے جوبلی ہلز اسمبلی ضمنی انتخاب کی انتخابی مہم کے دوران دیا تھا۔بنڈی سنجے نے لکھامیں تلنگانہ کے وزیراعلیٰ ریونت ریڈی کے نامناسب اوراوچھے بیان کی سخت مذمت کرتا ہوں۔

پاکستان نے ہمیں دھکا دیا اور بھارت نے جواب نہیں دیا ۔یہ بیان ہمارے بہادر فوجیوں کی توہین ہے جنہوں نے آپریشن سندورکے دوران دہشت گرد کیمپوں کو تباہ کیا۔ ہندوستان کی ہرگلی میں ہمارے جوانوں کی بہادری پر فخرکی گونج سنائی دیتی ہے۔انہوں نے دعویٰ کیاکہ دنیا بھرمیں آپریشن سندور کو وزیراعظم نریندرمودی کی دہشت گردی کے خلاف فیصلہ کن کارروائی کی علامت کے طور پرسراہاجارہاہے۔وزیراعلیٰ کوملک کے عوام اور ان بہادر فوجیوں سے،جنہوں نے قوم کے لئے اپنی جانوں کو خطرے میں ڈالا، فوری معافی مانگنی چاہیے۔

قبل ازیں،وزیراعلیٰ ریونت ریڈی نے کانگریس امیدوار نوین یادو کی انتخابی مہم کے دوران بی جے پی رہنماؤں پر شدیدتنقید کرتے ہوئے کہا تھا کہ وہ جوبلی ہلز میں کارپیٹ بمباری کرنے کی بات کرتے ہیں، مگرپاکستان کے خلاف جنگ کے دوران ایسا کیوں نہیں کیا؟انہوں نے مرکزی وزراء کشن ریڈی اوربنڈی سنجے کمارسے سوال کیاکہ کیاوہ ریاست کے لئے کوئی فنڈ لائے ہیں؟ وزیراعلی نے کہاکہ بی جے پی قائدین یہ کہتے ہیں کہ وہ جوبلی ہلزپرکارپیٹ بمباری کریں گے۔ بی جے پی کے ارکان پارلیمنٹ وزیراعظم مودی سے فنڈ مانگے بغیر جوبلی ہلزمیں گھوم رہے ہیں۔وزیراعلیٰ کے ساتھ کانگریس رہنمااورسابق بھارتی کرکٹ کپتان محمداظہرالدین بھی موجود تھے،جنہوں نے اسی دن ریاستی وزیرکے طورپرحلف لیا۔

ہندوستھان سماچار

ہندوستان سماچار / محمدعبدالخالق