کھنڈوا، 2 نومبر (ہ س)۔

مدھیہ پردیش کے کھنڈوا ضلع کے جاور تھانہ حدود کے گاوں پیٹھیاں (مچھوڑی ریئت) میں واقع ایک مدرسے میں اتوار کو بڑی مقدار میں نقلی نوٹ برآمد ہوئے ہیں۔ مسجد میں امام کے طور پر تعینات زبیرولد اشرف انصاری کے کمرے میں پولیس کو تلاشی کے دوران ایک بیگ میں نقلی نوٹوں کے بنڈل ملے، جن کی کل قیمت تقریباً 16 لاکھ روپے ہے۔ برآمد شدہ نقلی نوٹوں کی گنتی جاری ہے۔ پولیس معاملے کی تحقیقات میں مصروف ہے۔

پولیس کے مطابق مہاراشٹر کے مالے گاوں پولیس نے پچھلے جمعہ کو نقلی نوٹوں کے ساتھ زبیر اور اس کے ساتھی نجیم اکم ایوب انصاری کو 10 لاکھ کے نقلی نوٹوں کے ساتھ گرفتار کیا تھا۔ اس وقت یہ معاملہ میڈیا میں آیا تھا۔ اس کے بعد جاور تھانہ حدود کے رہائشی ایک شخص نے میڈیا رپورٹس میں دیکھا کہ دو میں سے ایک ملزم، پیٹھیاں گاوں کی مسجد کا امام زبیر ہے، تو اس نے اس کی اطلاع جاور پولیس کو دی۔

اس کے بعد پولیس پیٹھیاں گاوں پہنچی اور وہاں لوگوں سے پوچھ گچھ کی۔ مدھیہ پردیش کے اعلیٰ حکام نے مہاراشٹر کے مالے گاوں پولیس سے رابطہ کیا تو معلوم ہوا کہ انہوں نے اسی زبیر نام کے شخص کو گرفتار کیا ہے، جو پیٹھیاں کی مسجد کا امام ہے۔ اس کے بعد اتوار کو جاور ٹی آئی اور تھانے کی ٹیم کے علاوہ ڈی ایس پی ہیڈکوارٹر انیل سنگھ چوہان، ٹی آئی سلوچنا گہلود نے مدرسے میں ملزم زبیر کے کمرے کی تلاشی لی۔ تلاشی کے دوران امام زبیر کے کمرے سے ایک بیگ ملا، جس میں نقلی نوٹ برآمد ہوئے۔

پولیس کے مطابق زبیر بنیادی طور پر مدھیہ پردیش کے بورہان پور ضلع کے ہری پورہ علاقے کا رہائشی ہے۔ وہ مدرسے کی اوپری منزل پر کرائے کے کمرے میں رہتا تھا جبکہ دوسرا ملزم نجیم اکم ایوب انصاری بھی برہان پور کا رہائشی ہے۔ یہ دونوں نقلی نوٹ لے کر مالے گاوں کی طرف جا رہے تھے۔ مالے گاوں تعلقہ پولیس نے جمعہ کو ممبئی-آگرہ ہائی وے پر ہوٹل ایون کے قریب جال بچھا کر دونوں ملزمان کو پکڑ لیا تھا۔ تلاشی میں نقلی نوٹوں کے بنڈل برآمد ہوئے۔

تحقیقات کے دوران دونوں کے پاس سے 500 روپے کے 2000 نقلی نوٹ (کل 10 لاکھ روپے) اور دو موبائل ہینڈ سیٹ ضبط کیے گئے تھے۔ نوٹوں کی جانچ میں یہ واضح ہوا کہ وہ مکمل طور پر نقلی ہیں۔پولیس نے تعزیرات ہند 2023 کی دفعہ 179، 180، اور 3(5) کے تحت مقدمہ درج کیا ہے اور دونوں کو آٹھ دن کی ریمانڈ پر لیا ہے۔

کھنڈوا ضلع کے پولیس سپرنٹنڈنٹ وریندر کمار سنگھ نے کہا کہ یہ معاملہ بین ریاستی جعلی کرنسی ریکیٹ سے منسلک ہو سکتا ہے۔ کھنڈوا پولیس، مہاراشٹر پولیس کے ساتھ مل کر پورے نیٹ ورک کا پتہ لگانے کے لیے کام کر رہی ہے۔

ہندوستھان سماچار

---------------

ہندوستان سماچار / انظر حسن