جموں, 19 نومبر (ہ س)۔
جموں و کشمیر میڈیکل ایمپلائز فیڈریشن نے محکمۂ صحت و طبی تعلیم سے مطالبہ کیا ہے کہ فیملی ویلفیئر ڈپارٹمنٹ کے 2211 ہیڈ کے تحت خدمات انجام دینے والی فیمیل ملٹی پرپز ورکرز کی طویل عرصے سے رکی ہوئی تنخواہیں فوری طور پر جاری کی جائیں۔ فیڈریشن کا کہنا ہے کہ متعدد احکامات کے باوجود معاملہ تاحال حل نہیں ہوا۔
فیڈریشن کے صدر جسوندر سنگھ نے صحافیوں سے گفتگو میں بتایا کہ ریاستی انتظامی کونسل نے 20 جون 2024 کو ملازمین کی تنخواہیں باقاعدگی سے جاری کرنے اور انہیں مرکزی معاونت یافتہ اسکیم کے تحت ریگولرائز کرنے کے احکامات دیے تھے، لیکن ان پر ابھی تک کوئی عملی پیش رفت نہیں ہوئی۔
انہوں نے بتایا کہ محکمۂ صحت و طبی تعلیم کے کمشنر سکریٹری نے 19 جون 2024 کو بھی ایک حکم نامہ جاری کیا تھا، جس میں 2211 ہیڈ کے تحت ملازمین کے بقایا جات اور باقاعدہ ادائیگی کے لیے رقم جاری کرنے کی ہدایت کی گئی تھی۔ اس کے باوجود خواتین کارکنان کی تنخواہیں بدستور رکی ہوئی ہیں۔
جموں و کشمیر میڈیکل ایمپلائز فیڈریشن نے حکومت سے اپیل کی ہے کہ فیملی ویلفیئر ملازمین کی واجب الادا تنخواہیں فی الفور جاری کی جائیں تاکہ انہیں درپیش مالی دشواریوں کا ازالہ ہو سکے۔
ہندوستھان سماچار
---------------
ہندوستان سماچار / محمد اصغر
