نئی دہلی، 18 نومبر (ہ س)۔ دہلی کی راوس ایونیو کورٹ نے دہلی وقف بورڈ میں بھرتیوں میں بے ضابطگیوں کے سلسلے میں عام آدمی پارٹی کے ایم ایل اے امانت اللہ خان سمیت 11 ملزمان کے خلاف دائر مقدمے میں استغاثہ کے گواہ کا بیان ریکارڈ کیا۔ خصوصی جج دگ وجے سنگھ نے کیس کی اگلی سماعت کل 19 نومبر کو کرنے کا حکم دیا۔
آج سماعت کے دوران عدالت نے پریمراج کوشک کا بیان ریکارڈ کیا۔ ملزمان کی نمائندگی کرنے والے وکلاءنے پریمراج کوشک سے جرح کے لیے وقت کی درخواست کی جسے عدالت نے منظور کر لیا۔ 28 جولائی کو عدالت نے امانت اللہ خان سمیت 11 ملزمان پر فرد جرم عائد کی۔ جن ملزمان کے خلاف عدالت نے الزامات عائد کرنے کا حکم دیا ان میں دہلی وقف بورڈ کے اس وقت کے سی ای او محبوب عالم، حامد اختر، کفایت اللہ خان، رفیوشن خان، عمران علی، محمد ابرار، عاقب جاوید، اظہر خان، ذاکر خان اور عبدالمنار شامل ہیں۔ عدالت نے یکم مارچ 2023 کو تمام ملزمان کی ضمانت منظور کی، 3 نومبر 2022 کو عدالت نے ملزمان کے خلاف دائر چارج شیٹ کا نوٹس لیا۔ عدالت نے ملزمان کے خلاف تعزیرات ہند کی دفعہ 120بی اور انسداد بدعنوانی ایکٹ کی دفعہ 13(2)، 13(1)(ڈی) کے تحت الزامات طے کرنے کا حکم دیا تھا۔اس معاملے میں 23 نومبر 2016 کو ایک ایف آئی آر درج کی گئی تھی۔ جانچ کے بعد سی بی آئی نے 21 اگست 2022 کو چارج شیٹ داخل کی تھی۔ چارج شیٹ میں کہا گیا ہے کہ امانت اللہ خان نے محبوب عالم اور دیگر ملزمین کے ساتھ مل کر سازش کی جو وقف بورڈ کے اندر مختلف عہدوں پر تعینات تھے۔چارج شیٹ کے مطابق یہ تقرریاں من مانی کی گئیں اور امانت اللہ خان اور محبوب عالم نے اپنے عہدے کا غلط استعمال کیا۔ سی بی آئی کے بعد ای ڈی نے بھی دہلی وقف بورڈ معاملے میں منی لانڈرنگ ایکٹ کے تحت مقدمہ درج کیا ہے۔ عدالت نے ای ڈی کی طرف سے داخل کی گئی چارج شیٹ کا نوٹس لیا ہے۔ ای ڈی نے 9 جنوری 2024 کو چارج شیٹ داخل کی تھی۔ تقریباً پانچ ہزار صفحات کی چارج شیٹ میں ای ڈی نے جن لوگوں کو ملزم بنایا ہے، ان میں جاوید امام صدیقی، داو¿د ناصر، کوثر امام صدیقی اور ذیشان حیدر کو ملزم بنایا گیا ہے۔ ای ڈی نے پارٹنرشپ فرم اسکائی پاور کو بھی ملزم بنایا ہے۔
ہندوستھان سماچار
ہندوستان سماچار / Mohammad Khan
