ویلنگٹن، 18 نومبر (ہ س)۔ نیوزی لینڈ کے آل راونڈر ڈیرل مچل ویسٹ انڈیز کے خلاف جاری ون ڈے سیریز سے باہر ہو گئے ہیں۔ ان کی جگہ دوسرے ون ڈے کے لئے نامزد کئے گئے ہنری نیکولس اب پوری سیریز میں ٹیم کا حصہ بنے رہیں گے۔

پہلے ون ڈے میں ویسٹ انڈیز کے خلاف ہیگلے اوول میں کھیلے گئے میچ میں سنچری بنانے کے دوران مچل کو ران میں کھنچاو محسوس ہوا تھا۔ ان کی سنچری اننگ کی بدولت نیوزی لینڈ نے یہ میچ 7 رن سے جیتا تھا۔ چوٹ کی وجہ سے وہ دوسری اننگ میں میدان پر واپس نہیں آ سکے۔ اسکین میں ہلکی گروئن انجری (مائنر ٹیئر) کی تصدیق ہوئی ہے، جس کے لئے دو ہفتے کے ریہیب کی ضرورت ہوگی۔

ٹیم مینجمنٹ کے مطابق، توقع ہے کہ مچل دو دسمبر سے شروع ہونے والی تین میچوں کی ٹیسٹ سیریز تک مکمل طور پر فٹ ہو جائیں گے۔

ٹیم کے ہیڈ کوچ روب وولٹر نے کہا، ’’کسی کھلاڑی کا انجری کی وجہ سے سیریز سے جلد باہر ہونا ہمیشہ مشکل ہوتا ہے، خاص طور پر جب وہ شان دار فارم میں ہو۔ ڈیرل اس سیزن میں ہمارے بہترین ون ڈے کھلاڑی رہے ہیں اور ان کی کمی محسوس کی جائے گی۔ اچھی بات یہ ہے کہ چوٹ معمولی ہے اور وہ ٹیسٹ سیریز کے لیے دستیاب رہیں گے۔‘‘

نکولس کی واپسی پر انہوں نے کہا، ’’وہ ہنری فورڈ ٹرافی میں بہترین فارم میں ہیں اور تجربہ کار کھلاڑی ہیں۔ ایسے کھلاڑیوں کو موقع دینا ہمیشہ خوشی کا باعث ہوتا ہے اور ہمیں یقین ہے کہ موقع ملنے پر وہ اپنا بہترین کھیل پیش کریں گے۔‘‘

ہندوستھان سماچار

---------------

ہندوستان سماچار / انظر حسن