نئی دہلی، 16 نومبر (ہ س) ہندوستان اور جنوبی افریقہ کے درمیان کولکاتا میں جاری پہلے ٹیسٹ کی پہلی اننگ کے دوران زخمی ہونے والے ہندوستانی کپتان شبھمن گیل اب پورے میچ سے باہر ہوگئے ہیں۔ بورڈ آف کنٹرول فار کرکٹ ان انڈیا (بی سی سی آئی) نے تصدیق کی ہے کہ گل مزید ٹیسٹ میچ میں حصہ نہیں لیں گے۔ میڈیکل ٹیم کی طرف سے ان کی کڑی نگرانی کی جا رہی ہے۔
ہفتہ کو ہندوستان کی پہلی اننگ کے دوران، کپتان شبھمن گل صرف 4 رن بنانے کے بعد ریٹائرڈ ہرٹ ہو گئے تھے۔ اس نے گردن میں درد محسوس کیا اور میدان چھوڑ دیا۔
بی سی سی آئی نے اتوار کو ایک اپ ڈیٹ فراہم کرتے ہوئے کہا کہ کپتان شبھمن گل کولکاتا میں جنوبی افریقہ کے خلاف جاری ٹیسٹ میچ کے دوسرے دن گردن میں انجری کا شکار ہوئے۔ دن کے کھیل کے بعد اسے تشخیص کے لیے اسپتال لے جایا گیا۔ وہ اس وقت اسپتال میں زیر نگرانی ہیں۔ وہ مزید ٹیسٹ میچ میں شرکت نہیں کریں گے۔ بی سی سی آئی کی میڈیکل ٹیم ان کی نگرانی جاری رکھے گی۔
میچ کی بات کریں تو تیسرے دن جنوبی افریقہ کی دوسری اننگ 153 رنوں پر ڈھیر ہوگئی۔ اس سے بھارت کو جیت کے لیے 124 رن کا ہدف ملا۔ اس ہدف کے تعاقب میں بھارت نے اب تک تین وکٹوں کے نقصان پر 36 رن بنا لیے ہیں۔ ایڈن گارڈن کی اس مشکل پچ پر بھارت کو جیت کے لیے ابھی مزید 88 رن درکار ہیں۔
---------------
ہندوستان سماچار / عبدالسلام صدیقی
