سرینگر، 15 نومبر (ہ س):۔ سرینگر کے نوگام پولیس اسٹیشن میں کل رات دیر گئے ہوئے ایک زور دار دھماکے میں ایک نائب تحصیلدار سمیت 9 افراد ہلاک اور 30 سے زیادہ زخمی ہو گئے۔ ایک افسر نے بتایا کہ دھماکہ اس وقت ہوا جب پولیس اسٹیشن کے اندر رکھا گیا ایک ضبط شدہ دھماکہ خیز مواد پھٹ گیا۔ انہوں نے کہا کہ دھماکہ خیز مواد - غالباً امونیم نائٹریٹ - حال ہی میں ہریانہ کے فرید آباد سے نوگام پولیس اسٹیشن میں لایا گیا تھا۔ یہ دھماکہ خیز مواد جموں و کشمیر پولیس اور فرید آباد پولیس نے ڈاکٹروں کے مبینہ دہشت گردی کے ماڈیول کا پردہ فاش کرنے کے بعد ضبط کیا تھا۔ انہوں نے کہا کہ مرنے والوں میں زیادہ تر پولیس اہلکار اور ایف ایس ایل ٹیم کے ارکان ہیں۔ ایک نائب تحصیلدار اور ایک مقامی درزی بھی مرنے والوں میں شامل ہیں جبکہ 30 دیگر زخمی ہیں۔ زخمیوں میں سے کچھ کی حالت تشویشناک ہے۔ افسر نے مزید کہا کہ لاشوں کی شناخت کا کام جاری ہے کیونکہ کچھ مکمل طور پر جھلس چکی ہیں۔ دھماکے کی شدت اتنی تھی کہ پولیس اسٹیشن سے تقریباً 100-200 میٹر کے فاصلے پر - قریبی گھروں سے جسم کے کچھ اعضاء برآمد ہوئے۔ انہوں نے مزید کہا کہ زخمیوں کو علاج کے لیے سری نگر کے فوج کے 92 بیس اسپتال اور سکمز صورہ میں داخل کرایا گیا ہے، جب کہ کچھ کو علاج کے لیے مقامی نجی اسپتال میں داخل کرایا گیا ہے۔ہندوستھان سماچار

ہندوستان سماچار / Aftab Ahmad Mir