ممبئی،
13 نومبر (ہ س) ۔
مہاراشٹر کی سیاست میں ایک نئی پیش رفت کے تحت مہاراشٹر کانگریس
پارٹی کے سابق ضلع صدر پرکاش دھومل نے پارٹی چھوڑ کر نیشنلسٹ کانگریس پارٹی (اجیت
پوار گروپ) میں شمولیت اختیار کرلی۔ جمعرات کی صبح انہوں نے کانگریس کی بنیادی رکنیت
سے استعفیٰ دیا اور بعد ازاں ممبئی میں این سی پی اے پی کے دفتر میں منعقدہ ایک
سادہ مگر باوقار تقریب میں باضابطہ طور پر پارٹی میں شامل ہوئے۔
تقریب میں
نائب وزیر اعلیٰ اجیت پوار، سابق مرکزی وزیر پرفل پٹیل، اور این سی پی اے پی کے ریاستی
صدر سنیل تٹکرے شریک تھے۔ تٹکرے نے اس موقع پر کہا کہ “پرکاش دھومل گزشتہ چالیس
برسوں سے کانگریس کے سرگرم اور وفادار رہنما رہے ہیں۔ انہوں نے پارٹی کے اصولوں
اور نظریاتی موقف کو عوام تک پہنچانے میں نمایاں کردار ادا کیا۔”
تٹکرے
نے مزید کہا کہ دھومل سابق مرکزی وزیر اور انڈین نیشنل کانگریس کے قومی جنرل سکریٹری
مکل واسنک کے مضبوط حامی رہے ہیں اور انہوں نے اپنی تنظیمی صلاحیت سے ہمیشہ پارٹی
کو مضبوط کیا۔ انہوں نے کہا کہ “دھومل کی شمولیت این سی پی اے پی کے لیے بلدیاتی
انتخابات سے قبل غیر معمولی اہمیت رکھتی ہے۔”
دھومل
نے اپنے طویل سیاسی کیریئر میں ضلع کانگریس سیوا دل کے صدر، مہاراشٹر پردیش کانگریس
سیوا دل کے آرگنائزنگ سکریٹری اور مختلف عہدوں پر انسپکٹر کے طور پر خدمات انجام دیں۔
تٹکرے
نے اس موقع پر کہا کہ پرکاش دھومل جیسے تجربہ کار لیڈر کا این سی پی اے پی میں
آنا پارٹی کے لیے ایک نئی توانائی لائے گا۔ انہوں نے اس امید کا اظہار کیا
کہ دھومل کی شمولیت سے اجیت پوار گروپ کو زمینی سطح پر مزید تقویت ملے گی۔
ہندوستھان
سماچار
--------------------
ہندوستان سماچار / جاوید این اے
13 Nov 2025