بھوپال، 10 نومبر (ہ س)۔ شمالی ہندوستان کے پہاڑی ریاستوں میں برف باری کے بعد مدھیہ پردیش میں سردی نے اپنا اثر دکھانا شروع کر دیا ہے۔ راجدھانی بھوپال، اندور اور اجین سمیت آدھی ریاست سرد لہر کی زد میں ہے۔ محکمہ موسمیات نے آج، پیر کے دن 20 ضلعوں میں سرد لہر کا الرٹ جاری کیا ہے۔

محکمہ موسمیات کے مطابق، جموں و کشمیر، ہماچل پردیش اور اتراکھنڈ میں ہو رہی برف باری کے سبب شمالی ہوائیں براہِ راست مدھیہ پردیش کی جانب بڑھ رہی ہیں، جس کی وجہ سے درجہ حرارت میں مسلسل کمی دیکھی جا رہی ہے۔ گزشتہ اتوار کو ریاست کے کئی حصوں میں درجۂ حرارت معمول سے 5 سے 7 ڈگری نیچے درج کیا گیا۔ پچھلے دو دنوں میں بھوپال، راجگڑھ، سیہور، اندور اور شاجاپور میں شدید سرد لہر کا اثر رہا، جبکہ ریوا، شہڈول اور جبل پور میں بھی سرد ہوائیں چلتی رہیں۔ پیر کے روز بھوپال، اندور، آگر مالوا، راجگڑھ، سیہور، دیواس، اجین، شاجاپور، نیواڑی، ٹیکم گڑھ، چھترپور، ریوا، مئوگنج، ستنا، پنا، میہر، کٹنی، جبل پور، امریا اور شہڈول میں سرد لہر کا الرٹ جاری کیا گیا ہے۔

شاجاپور اس وقت سب سے سرد ضلع رہا۔ بھوپال میں کم از کم درجۂ حرارت 8 ڈگری سیلسیس ریکارڈ کیا گیا، جو نومبر ماہ کے گزشتہ 10 سالوں میں سب سے کم درجہ ہے۔ اندور میں پارہ 7 ڈگری سیلسیس تک گر گیا، جو نومبر کی پچھلے 25 برسوں کی سب سے سرد رات رہی۔ 1938 میں یہاں نومبر ماہ میں تاریخی ریکارڈ 5.6 ڈگری درج کیا گیا تھا۔ اسی طرح راجگڑھ میں بھی درجۂ حرارت 7 ڈگری تک گر گیا۔ اجین، جبل پور، گوالیار، ریوا اور سیہور میں بھی سردی نے اپنا اثر دکھایا۔ اجین میں 10.5 ڈگری، گوالیار میں 10.7 ڈگری اور جبل پور میں 9.8 ڈگری سیلسیس درجۂ حرارت ریکارڈ کیا گیا۔

ہفتہ اور اتوار کی رات ریاست کے کئی شہروں میں پارہ ریکارڈ سطح تک گر گیا۔ ریاست کے واحد ہِل اسٹیشن پچمڑھی میں باقی شہروں کے مقابلے سردی کا اثر کم رہا۔ یہاں پارہ 15 ڈگری سیلسیس رہا۔ سیہور میں 8.5 ڈگری، امریا میں 9.5 ڈگری، ملاج کھنڈ میں 9.6 ڈگری اور ریوا میں 9.9 ڈگری درج کیا گیا۔ اسی طرح چھندواڑہ میں 10 ڈگری، نوگاوں میں 10.5 ڈگری، منڈلا میں 10.6 ڈگری، بیتول میں 10.8 ڈگری، گُنا، دموہ اور شوپور میں 11 ڈگری، ساگر میں 11.5 ڈگری، دھار میں 11.6 ڈگری، ٹیکم گڑھ اور ستنا میں 11.8 ڈگری، رتنا میں 12.2 ڈگری، دتیا میں 12.5 ڈگری، شیوپور میں 12.6 ڈگری، کھجوراہو میں 13 ڈگری، کھنڈوا، سیدھی اور نرسنگھ پور میں 13.4 ڈگری، نرمداپورم میں 13.7 ڈگری اور کھرگون میں پارہ 14.2 ڈگری سیلسیس ریکارڈ کیا گیا۔

موسم ماہرین کا کہنا ہے کہ یہ سردی نومبر کے ابتدائی دور کے لحاظ سے غیر معمولی ہے۔ آنے والے دنوں میں دھند کی شدت بھی بڑھ سکتی ہے، خاص طور پر دیر رات اور صبح کے وقت۔ دن کے درجۂ حرارت میں بھی سردی محسوس کی جانے لگی ہے۔ اتوار کو بیشتر شہروں میں زیادہ سے زیادہ درجۂ حرارت 30 ڈگری سے نیچے رہا۔

ہندوستھان سماچار

---------------

ہندوستان سماچار / انظر حسن