حیدرآباد ،31 اکتوبر (ہ س)۔ محکمۂ اقلیتی بہبود کے معززضلعی عہدیدارجی شنکرا چاری کے وظیفۂ حسنِ خدمت پرمحبوب نگرمیں ایک شانداروداعی تقریب کاانعقاد کیا گیا، جس میں محبوب نگر، نارائن پیٹ اوررنگاریڈی اضلاع کے سرکاری افسران، ملازمین اورمعززشخصیات نے بڑی تعداد میں شرکت کی۔ یہ تقریب اے ایس این گارڈن فنکشن ہال میں منعقد ہوئی۔ تقریب سے خطاب کرتے ہوئے محکمہ اقلیتی بہبود کے سپرنٹنڈنٹ اوراردو آفیسرڈاکٹرمنیب آفاق نے کہا کہ کسی بھی محکمہ کی کامیابی اورموثرنمائندگی کاانحصاراس کے ملازمین خصوصاً صدرِمحکمہ کی رہنمائی پرہوتا ہے۔ انہوں نے کہا کہ جس طرح گھر میں سربراہ مرکزی حیثیت رکھتا ہے،اسی طرح محکمہ میں اس کا نگران پورے نظام کو بہترین طریقے سے آگے بڑھاتا ہے۔ ڈاکٹر منیب آفاق نے جی شنکرا چاری کی خدمات کو سراہتے ہوئے بتایا کہ وہ ایک نہایت تجربہ کار، قابل اور ذمہ دار افسر ہیں جنہوں نے اپنی مدتِ کار کے دوران محکمہ اقلیتی بہبود کی ترقی کے لیے کئی اہم اقدامات کیے۔ انہوں نے بطور ڈسٹرکٹ مینارٹی ویلفیر آفیسر محبوب نگر میں پردھان منتری جن وکاس کاریہ کرم اسکیم کے تحت آٹھ عمارتیں منظور کروائیں، جن میں سے بویا پَلّی کی تین عمارتیں تکمیل کے آخری مراحل میں ہیں اورجلد افتتاح کے لیے تیار ہیں۔ انہوں نے مزید کہا کہ شنکرا چاری نے اقلیتی اقامتی اسکولوں اور کالجوں کو درپیش مسائل کو سنجیدگی سے لیتے ہوئے ڈسٹرکٹ کلکٹر کے ذریعے ان کا حل یقینی بنایا اور متعدد اداروں کو مالی امداد بھی فراہم کی۔ ان کی رہنمائی اور نگرانی کے باعث محکمہ میں بہترین ماحول قائم رہا، جہاں وہ اپنے اسٹاف کو نہ صرف حوصلہ دیتے تھے بلکہ ان کی رہنمائی بھی کرتے تھے۔ ڈاکٹر منیب آفاق نے ان کی ذاتی زندگی کاذکرکرتے ہوئے کہاکہ شنکراچاری نہ صرف ایک بہترین افسر ہیں بلکہ ایک ذمہ دار خاندان کے سربراہ بھی ہیں۔ انہوں نے اپنے دونوں فرزندوں کو اعلیٰ تعلیم دلائی۔ ایک فرزند امریکہ میں کمپیوٹر انجینیئر ہیں جبکہ دوسرے فرزند جڑچرلّہ گورنمنٹ ہاسپٹل میں اسسٹنٹ سیول سرجن کے طورپرخدمات انجام دے رہے ہیں۔ تقریب میں سرینیواس، موگولیا، شہناز بیگم، عرفان حسین، ڈپٹی رجسٹرار ٹائٹس پال، اسسٹنٹ رجسٹرار راج شیکھر، باشاہ اَنّا اور دیگر ملازمین بھی موجود تھے، جنہوں نے جی شنکرا چاری کی پیشہ ورانہ خدمات، خوش اخلاقی اور انتظامی صلاحیتوں کو بھرپور خراجِ تحسین پیش کیا۔

ہندوستھان سماچار

ہندوستان سماچار / محمدعبدالخالق