نیوجرسی(امریکہ)،31اکتوبر(ہ س)۔میکسیکو کے شہر کنکون سے نیو جرسی جانے والی امریکی ایئر لائن جیٹ بلیو کی فلائٹ دورانِ پرواز سنگین تکنیکی مسائل کا شکار ہو گئی، جس کے باعث مسافر طیارے کو ریاست فلوریڈا کے شہر ٹمپا میں ہنگامی لینڈنگ کرنا پڑی، واقعہ میں متعدد مسافر زخمی ہو گئے۔تفصیلات کے مطابق جیٹ بلیو فلائٹ 1230 کو لے جانے والا ایئربس A320 طیارہ کنکون انٹرنیشنل ایئرپورٹ سے اڑان بھرنے کے بعد نیو جرسی کے نیوارک لبرٹی انٹرنیشنل ایئرپورٹ کی جانب رواں دواں تھا کہ اچانک پرواز کی اونچائی میں شدید کمی واقع ہوئی۔ اس اچانک جھٹکے کے نتیجے میں متعدد مسافر اور عملے کے افراد زخمی ہوئے۔

فیڈرل ایوی ایشن ایڈمنسٹریشن نے واقعہ کی تصدیق کرتے ہوئے کہا ہے کہ واقعہ کی مکمل تحقیقات شروع کر دی گئی ہیں۔جیٹ بلیو کے ترجمان کے مطابق طیارے کے اترنے کے فورا بعد طبی عملے نے زخمی مسافروں اور عملے کا معائنہ کیا جبکہ 15 سے 20 افراد کو معمولی زخموں کے باعث قریبی اسپتال منتقل کیا گیا۔ترجمان نے کہا کہ طیارے کا معائنہ جاری ہے اور مکمل تحقیقات کے بعد واقعہ کی وجوہات سامنے لائی جائیں گی۔

ہندوستھان سماچار

ہندوستان سماچار / Mohammad Khan