گواہاٹی، 30 اکتوبر (ہ س)۔ اے سی اے اسٹیڈیم، گواہاٹی میں بدھ کو کھیلے گئے خواتین ون ڈے ورلڈ کپ 2025 کے پہلے سیمی فائنل میں جنوبی افریقہ نے انگلینڈ کو 125 رنوں سے شکست دے کر تاریخ رقم کر دی۔ اس طرح پہلی بار جنوبی افریقہ کی خواتین ٹیم ون ڈے ورلڈ کپ کے فائنل میں پہنچی ہے۔

میچ میں انگلینڈ نے ٹاس جیت کر پہلے گیند بازی کا فیصلہ کیا، لیکن جنوبی افریقہ کی کپتان لورا وولواڈرٹ نے شاندار بلے بازی کرتے ہوئے اپنی ٹیم کو مضبوط پوزیشن میں پہنچا دیا۔ انہوں نے 169 رنوں کی اننگز کھیلی، جو ان کے ون ڈے کیریئر کی دسویں سنچری اور ورلڈ کپ کی پہلی سنچری ہے۔ وولواڈرٹ نے تاجمن بریٹس (45) کے ساتھ پہلی وکٹ کے لیے 116 رنوں کی شراکت کی۔ حالانکہ انگلینڈ کی صوفی ایکلسٹن نے 10 اوور میں 44 رن دے کر 4 وکٹ حاصل کر کے کچھ حد تک واپسی کرائی، لیکن جنوبی افریقہ نے 50 اوور میں 7 وکٹ پر 319 رنوں کا بڑا اسکور کھڑا کیا۔

320 رنوں کے ہدف کا تعاقب کرنے اتری انگلینڈ کی شروعات بہت خراب رہی۔ ٹیم نے صرف 1 رن پر 3 وکٹیں کھو دیں۔ ماری جان کیپ نے اپنے پہلے اوور میں ہی ایمی جونز اور ہیتر نائٹ کو پویلین بھیج دیا۔ دوسرے اوور میں ایابانگا خاکا نے ٹیمنی بیومونٹ کو آوٹ کر کے انگلینڈ کی حالت مزید خراب کر دی۔

کپتان نٹالی سیور برنٹ (64) اور ایلس کیپسی (50) نے چوتھی وکٹ کے لیے 107 رنوں کی شراکت کر کے انگلینڈ کو کچھ راحت دی، لیکن اس کے بعد ٹیم سنبھل نہیں سکی۔ کیپ نے شاندار گیند بازی کرتے ہوئے اپنے 7 اوور کے اسپیل میں صرف 20 رن دے کر 5 وکٹیں حاصل کیں۔ انگلینڈ کی پوری ٹیم 42.3 اوورز میں 194 رن پر آل آوٹ ہو گئی۔

جنوبی افریقہ نے اس جیت کے ساتھ انگلینڈ سے پرانے تمام حساب برابر کر لیے۔ گزشتہ دو ورلڈ کپ (2017 اور 2022) کے سیمی فائنل میں انگلینڈ نے جنوبی افریقہ کو باہر کیا تھا۔ یہاں تک کہ موجودہ ٹورنامنٹ کے لیگ میچ میں بھی جنوبی افریقہ صرف 69 رن پر آوٹ ہو گئی تھی۔

کپتان لورا وولواڈرٹ کو ان کی شاندار کارکردگی کے لیے ’’پلےئر آف دی میچ‘‘ منتخب کیا گیا۔ جبکہ ماری جان کیپ کی گیند بازی نے اس میچ کو تاریخی بنا دیا۔

ہندوستھان سماچار

---------------

ہندوستان سماچار / انظر حسن