سیول (جنوبی کوریا)، 29 اکتوبر (ہ س) ۔

امریکی صدر ڈونالڈ ٹرمپ اس وقت جنوبی کوریا کے شمالی گیونگ سانگ صوبے کے تاریخی شہر گیونگجو میں ہیں۔ وہ گیانگجو نیشنل میوزیم میں منعقد ہونے والی ایشیا پیسیفک اکنامک کوآپریشن (اے پی ای سی) سمٹ میں شرکت کریں گے۔ بدھ کی سہ پہر کو سربراہی اجلاس شروع ہونے سے پہلے، جنوبی کوریا کے صدر لی جے میونگ نے میوزیم کے باہر اپنے امریکی ہم منصب کا استقبال کیا۔ اس موقع پر ٹرمپ اور لی نے شمالی کوریا کے رہنما کم جونگ ان سے ملاقات کی منسوخی پر افسوس کا اظہار کیا۔

کوریا ٹائمز اخبار کے مطابق صدر لی اور امریکی صدر ٹرمپ نے کم جونگ ا±ن کے ساتھ اپنی متوقع ملاقات کی منسوخی پر افسوس کا اظہار کیا اور پیانگ یانگ کے ساتھ بات چیت میں اپنی مسلسل دلچسپی پر زور دیا۔ میوزیم کے باہر اپنے امریکی ہم منصب کا استقبال کرنے کے بعد، لی انہیں اندر لے گئے۔ لی نے ٹرمپ کو جزیرہ نما کوریا میں امن کے فروغ کے لیے ان کی کوششوں کے اعتراف میں گرینڈ آرڈر آف موگنگھوا (کوریا کا اعلیٰ ترین قومی اعزاز) پیش کیا۔ یہ پہلا موقع ہے کہ کسی امریکی صدر کو یہ اعزاز دیا گیا ہے۔

اس سے قبل، ٹرمپ کا بوسان کےگمہے بین الاقوامی ہوائی اڈے پر رسمی استقبال کیا گیا، جس میں 21 توپوں کی سلامی بھی شامل تھی۔ وزیر خارجہ چو ہیون اور امریکہ میں کوریا کے سفیر کانگ کیونگ وہا نے امریکی صدر کا استقبال کیا۔ ہوائی اڈے سے، ٹرمپ اپنے سرکاری ہیلی کاپٹر، میرین ون میں سوار ہوئے، تقریباً 80 کلومیٹر کی پرواز کے لیے گیانگجو کے لیے روانہ ہوئے۔

ہندوستھان سماچار

ہندوستان سماچار / عطاءاللہ