تل ابیب،19اکتوبر(ہ س)۔اسرائیلی وزیرِ اعظم بنجامن نیتن یاہو نے ہفتے کے روز کہا کہ وہ اپنے عہدے کے لیے نومبر 2026 کے انتخابات میں حصہ لیں گے اور جیت کی امید ظاہر کی۔دائیں بازو کے چینل 14 پر ایک پروگرام میں نیتن یاہو سے پوچھا گیا کہ کیا وہ بطورِ وزیرِ اعظم دوسری مدت کے لیے انتخاب لڑنے کا ارادہ رکھتے ہیں۔ تو انہوں نے جواب دیا، ’جی ہاں۔‘ جب ان پر زور دیا گیا کہ آیا وہ جیتنے کی توقع رکھتے ہیں تو تجربہ کار سیاسی رہنما نے جواب دیا: جی ہاں۔اسرائیل کی دائیں بازو کی مرکزی جماعت لیکود پارٹی کے رہنما نیتن یاہو کے پاس اسرائیلی وزیرِ اعظم کے طور پر طویل ترین عرصے تک خدمات انجام دینے کا ریکارڈ ہے۔ 1996 کے بعد سے اب تک وہ وقفوں کے ساتھ کل 18 سال سے زیادہ عرصہ خدمات انجام دے چکے ہیں۔گذشتہ انتخابات میں ان کی لیکود پارٹی نے کنیسٹ میں 32، اس کے الٹرا آرتھوڈوکس اتحادیوں نے 18 اور مذہبی صیہونیت اتحاد نے 14 نشستیں حاصل کیں جو انتہائی دائیں بازو کے لیے ایک ریکارڈ ہے۔ان کی موجودہ مدت کا آغاز عدالتی بحالی کے ایک متنازعہ منصوبے سے ہوا جس کے خلاف مہینوں تک وسیع پیمانے پر مظاہرے ہوئے۔ ان میں دسیوں ہزار اسرائیلی تقریباً روزانہ سڑکوں پر آیا کرتے تھے۔واضح رہے کہ نیتن یاہو کو غزہ جنگ کے حوالے سے قیدیوں کے خاندانوں کی بڑھتی ہوئی تنقید کا بھی سامنا کرنا پڑا ہے۔ہندوستھان سماچار

ہندوستان سماچار / Mohammad Khan