ڈھاکا، 19 اکتوبر (ہ س)۔ حضرت شاہ جلال بین الاقوامی ہوائی اڈے کے کارگو ولیج میں ہفتہ کی دوپہر لگی خوفناک آگ پر مکمل طور پر قابو پا لیا گیا ہے۔ دیر رات ہوائی اڈے سے پروازوں کا سلسلہ دوبارہ شروع ہو گیا۔ آگ لگنے کی وجوہات کا پتہ لگانے کے لیے تفتیش شروع کر دی گئی ہے۔

ڈھاکا کے حضرت شاہ جلال بین الاقوامی ہوائی اڈے کے کارگو ولیج علاقے میں ہفتہ کی دوپہر تقریباً سوا دو بجے شدید آگ بھڑک اٹھی تھی۔ آگ اس قدر تیزی سے پھیلی کہ تمام پروازوں کو فوراً روکنا پڑا۔ آسمان میں اٹھنے والا کالا دھواں آس پاس کے علاقوں میں پھیل گیا۔

اس دوران ایچ ایس آئی اے سے طیاروں کی پرواز روک دی گئی۔ احتیاط برتتے ہوئے کئی گھریلو طیاروں کو ڈھاکا میں اتارنے کے بجائے چٹگانگ بھیج دیا گیا۔ فائر بریگیڈ اور ہوائی اڈا انتظامیہ کی فوری اور مشترکہ کوششوں سے تقریباً سات گھنٹے بعد آگ پر قابو پایا گیا۔

میڈیا گروپ پروتھوم آلو نے شہری ہوابازی اور سیاحت کی وزارت کا حوالہ دیتے ہوئے بتایا ہے کہ ایچ ایس آئی اے کے کارگو ولیج میں لگی آگ پر مکمل طور پر قابو پا لیا گیا اور رات ساڑھے نو بجے پروازوں کا آپریشن دوبارہ شروع ہو گیا۔

وزارت کے مطابق دوپہر تقریباً دو بج کر پندرہ منٹ پر لگی آگ پر فائر بریگیڈ اور ہوائی اڈا انتظامیہ کی فوری اور مربوط کوششوں کے بعد قابو پا لیا گیا اور اس واقعے میں کسی کے زخمی یا ہلاک ہونے کی اطلاع نہیں ہے۔ آگ لگنے کی وجوہات جاننے کے لیے باضابطہ تحقیقات شروع کر دی گئی ہیں۔ وزارت نے کہا کہ آگ کے اسباب معلوم کرنے اور اس کے دوبارہ پیش آنے سے روکنے کے لیے مناسب اقدامات کیے جائیں گے۔

ہندوستھان سماچار

ہندوستان سماچار / انظر حسن