چنئی، 17 اکتوبر (ہ س)۔ نائب صدرجمہوریہ سی پی رادھا کرشنن کے مائلاپور، چنئی میں واقع گھرکو بم سے اڑانے کا ای میل موصول ہوا ۔ ایک نامعلوم شخص نے پولیس کو ای میل بھیج کر دھمکی دی۔ جس کے بعد پولیس نے چوکسی کے ساتھ ان کی پوری رہائش گاہ کی تلاشی لی لیکن کوئی دھماکہ خیز مواد نہیں ملا۔

نئی دہلی، بنگلورو اور چنئی جیسے بڑے شہروں میں اسکولوں، مشہور شخصیات اور اہم شخصیات کے گھروں کو بم سے اڑانے کی دھمکیاں معمول بن چکی ہیں۔ جمعہ کو، چنئی کے اسٹیٹ پولیس اسٹیشن کو ایک ای میل موصول ہوا جس میں بتایا گیا تھا کہ شہر کے مائلاپور علاقے میں نائب صدر کے گھر میں بم نصب کیا گیا ہے۔ فوری طور پر سینئر حکام نے اس اطلاع کو سنجیدگی سے لیا۔ تھوڑی دیر بعد سینئر پولیس افسران بم ڈسپوزل ماہرین اور ایک سنیفر ڈاگ کے ساتھ ان کی رہائش گاہ پر پہنچے۔ پولیس نے ان کی پوری رہائش گاہ کی مکمل تلاشی لی لیکن کچھ نہیں ملا۔

وی آئی پی سیکورٹی کے اصولوں کے مطابق، اہلکار پوز گارڈن میں ان کی موجودہ رہائش گاہ پر بھی پہنچے، لیکن ان کے اپارٹمنٹ کو تالا لگا ہوا تھا۔ اس لیے وہاں تلاشی نہیں لی جا سکی۔ آس پاس کے علاقوں کا معائنہ کرنے کے بعد پولیس اہلکاروں نے اسے مذاق سمجھا اور واپس چلے گئے۔ پولیس اس بات کی جانچ کر رہی ہے کہ دھمکی آمیز ای میل کہاں سے بھیجا گیا تھا۔

قابل ذکر ہے کہ نائب صدرجمہوریہ سی پی رادھا کرشنن نے اس سال ستمبر میں عہدہ سنبھالا تھا۔ پولیس کے مطابق انہوں نے مائلاپور میں اپنا گھر خالی کر دیا ہے۔ انہیں تقریباً ایک سال قبل بھی ایسی ہی دھمکی ملی تھی۔ وہ چنئی کے پرائم پوز گارڈن علاقے میں کرائے کے اپارٹمنٹ میں منتقل ہو گئے تھے۔

ہندوستھان سماچار

---------------

ہندوستان سماچار / عبدالواحد