ممبئی

، 15 اکتوبر(ہ س)۔

مہاراشٹر

میں سرکاری اسپتالوں کی صفائی اور جراثیم کش نظام کو مضبوط بنانے کے لیے حکومت نے

مکینیکل لانڈری سروس متعارف کرائی ہے۔ اس جدید سہولت کا افتتاح وزیر صحت پرکاش ابیتکر

نے بدھ کے روز سوستھیا بھون میں انجام دیا۔

اس اسکیم

کے تحت ریاست کے 593 سرکاری صحت مراکز میں مکینیکل لانڈری کا نفاذ کیا جا رہا ہے،

جن میں 20 ضلع اسپتال، 8 جنرل اسپتال، 105 ذیلی ضلعی اسپتال، 378 دیہی اسپتال، 22

خواتین اسپتال اور 60 ٹراما کیئر یونٹس شامل ہیں۔ ان اداروں میں مجموعی طور پر

29,315 بستروں کی گنجائش ہے۔

وزیر

صحت نے کہا کہ اس اقدام سے صفائی کے انتظام، نظم و ضبط اور مریضوں کی دیکھ بھال میں

نمایاں بہتری آئے گی۔ حکومت کی یہ پہل ملک بھر میں ایک نمونہ ثابت ہوگی۔ اس سسٹم

کے تحت اسپتالوں میں استعمال ہونے والی چادریں، کمبل، تکیے کے غلاف، تولیے، پردے

اور عملے کے یونیفارم جدید ٹیکنالوجی کے ذریعے دھوئے جائیں گے۔

لانڈری

میں بیریئر واشنگ ٹیکنالوجی کا استعمال کیا گیا ہے جس کے تحت کپڑوں کی دھلائی بغیر

کسی انسانی رابطے کے کی جائے گی تاکہ انفیکشن کا خطرہ کم ہو۔ وزیر نے مزید بتایا

کہ صفائی کے معیار کو برقرار رکھنے کے لیے ہفتے کے دنوں کے لحاظ سے رنگین چادروں

کا نظام بھی نافذ کیا گیا ہے — پیر اور جمعرات کو سفید، منگل اور جمعہ کو سبز،

جبکہ بدھ اور ہفتہ کو گلابی چادریں استعمال ہوں گی۔

انہوں

نے یقین ظاہر کیا کہ یہ منصوبہ متعدی بیماریوں کے پھیلاؤ میں نمایاں کمی لانے میں

مددگار ثابت ہوگا۔ افتتاحی موقع پر ڈاکٹر کادمبری بلکاوڑے اور محکمہ صحت کے دیگر سینئر

عہدیدار بھی موجود تھے۔

ہندوستھان

سماچار

--------------------

ہندوستان سماچار / جاوید این اے