تل ابیب، 15 اکتوبر (ہ س)۔ وزیراعظم بنجامن نیتن یاہو حماس کی قید سے رہائی پانے والے یرغمالیوں سے ملاقات کر کے ان کے دکھ کو سمجھنے کی کوشش کر رہے ہیں۔ انہوں نے منگل کو یہاں بیلنسن اسپتال میں رہائی پانے والے یرغمالیوں اور ان کے اہل خانہ سے ملاقات کی اور بات چیت کی۔ پیر کو رہا ہونے والے یرغمال ایتان مور کی کہانی سن کر نہ صرف وزیر اعظم بلکہ دوسرے بھی حیران رہ گئے۔ مور نے بتایا کہ غزہ میں اپنی اسیری کے دوران حماس کے ایک رہنما نے انہیں بتایا تھا کہ ان کی رہائی کے امکانات زیادہ ہیں کیونکہ ان کے خاندان نے ان مظاہروں میں حصہ نہیں لیا جس نے حکومت پر یرغمالیوں سے جنگ بندی کے معاہدے کے لیے دباو ڈالا تھا۔
ٹائمز آف اسرائیل کی ایک رپورٹ کے مطابق وزیر اعظم کے دفتر نے اس کی تصدیق کی ہے۔ رپورٹ کے مطابق مور نے وزیر اعظم کو بتایا کہ عزالدین الحداد اس وقت حماس کا ڈی فیکٹو لیڈر ہے۔ اس سے قبل وہ حماس کے غزہ سٹی بریگیڈ کی کمانڈ کر چکا ہے۔ اسی رہنما نے اپنی قید کے دوران اس سے کہا تھا،”اگر کسی کو سب سے پہلے رہا کیا جائے گا، تو وہ آپ ہیں۔ آپ کے والد ویسے بھی احتجاج پر نہیں جاتے، اس لیے ہم آپ کو پہلے واپس بھیج دیں گے۔“
مور کے والد زویکا تکوا فورم کے سربراہ ہیں۔ یہ یرغمال خاندانوں کا ایک چھوٹا گروپ ہے جو پچھلے معاہدوں کی مخالفت کرتا رہا ہے، جس میں غزہ میں عارضی جنگ بندی کے بدلے سیکڑوں فلسطینی سیکیورٹی قیدیوں اور صرف چند یرغمالیوں کی رہائی حاصل کو یقینی بنایا گیا تھا۔
دریں اثنا، یرغمالی خاندانوں نے حماس کی جانب سے لاشیں حوالے کرنے میں ناکامی پر آئی ڈی ایف کے سربراہ سے ملاقات کا مطالبہ کیا ہے۔ یرغمالی اور لاپتہ خاندانوں کے فورم نے کہا کہ وہ آئی ڈی ایف کے چیف آف اسٹاف لیفٹیننٹ جنرل ایال ضمیر سے بات کرنا چاہتا ہے۔
فورم نے ایک بیان میں کہا، ”اہل خانہ چیف آف اسٹاف سے وضاحت کا مطالبہ کریں گے کہ آئی ڈی ایف صرف معاہدے کی تعمیل کیوں کر رہا ہے، جبکہ اس بات کا سنگین خطرہ ہے کہ یرغمالی قید میں رہیں گے کیونکہ حماس دستخط شدہ معاہدے کی کھلم کھلا خلاف ورزی کر رہی ہے“۔
اہل خانہ کا الزام ہے کہ آئی ڈی ایف اب بھی 7 اکتوبر 2023 کے قتل عام سے پہلے کی طرح برتاو کر رہا ہے ۔ حماس کی باتوں پر یقین کر رہا ہے۔
ہندوستھان سماچار
ہندوستان سماچار / محمد شہزاد
