نئی دہلی، 15 اکتوبر (ہ س): امریکی کمپنی سِگ سوئر کی اسالٹ رائفلوں کے لیے نائٹ وژن آلات خریدے جائیں گے۔ بھارتی وزارت دفاع نے بدھ کو بھارتی فوج کی اسالٹ رائفلوں کے لیے 659.47 کروڑ روپے کے اس معاہدے پر دو کمپنیوں کے ساتھ دستخط کیے ہیں۔ یہ نائٹ وژن راتوں میں بھی 500 میٹر تک مؤثر رینج کے اہداف کو نشانہ بنانے قابل ہے اور موجودہ پیسیو نائٹ سائٹ کے مقابلے میں نمایاں بہتری لائے گی۔

وزارت دفاع نے اعلان کیا کہ کانپور کی کمپنی ایم کے یو لمیٹڈ اور نوئیڈا کی کمپنی میڈبِٹ ٹیکنالوجیز پرائیویٹ لمیٹڈ کے ساتھ 659.47 کروڑ روپے کے معاہدے پر دستخط کیے گئے ہیں۔ یہ سودا بھارتی فورسز کے لیے اسالٹ رائفل کے لیے نائٹ سائٹ (امیج انٹینسیفائر) اور معاون آلات کی خریداری کے لیے کیا گیا ہے۔ 51 فیصد سے زیادہ مقامی مواد کے ساتھ یہ خرید دفاعی پیداوار میں آتم نربھر بھارت کی طرف ایک بڑا قدم ہے۔ اس اقدام سے اجزاء کی تیاری اور خام مال کی فراہمی میں شامل چھوٹے کاروباروں کو بھی فائدہ ہوگا۔

بھارتی فوج نے فروری 2019 میں امریکی کمپنی ’سِگ سوئر‘ سے 600 میٹر تک مار کرنے کی صلاحیت رکھنے والی 72,400 سِگ-716 اسالٹ رائفلیں خریدی تھیں۔ فاسٹ ٹریک پروکیورمنٹ سودے کے تحت 647 کروڑ روپے میں خریدی گئی یہ رائفلیں دسمبر 2019 میں فراہم کی گئیں۔ سب سے پہلے جمّو و کشمیر کے ادھم پور میں واقع نارتھرن کمان کو یہ رائفلیں دی گئیں۔ بھارتی فوج کی تمام پیادہ فوج بٹالیونز کو کم از کم 50 فیصد سِگ سوئر رائفلیں مہیا کی گئی ہیں۔ پاکستان اور چین کی سرحدوں پر تعینات فوج بٹالینوں کو زیادہ تعداد میں رائفلیں فراہم کی گئی ہیں، جبکہ دیگر بٹالیونز کو کم از کم 50 فیصد دی گئی ہیں۔ ان کے علاوہ یہ رائفلیں بھارتی فوج اپنی اینٹی ٹیرر آپریشنز میں بھی استعمال کر رہی ہے۔

بھارتی مسلح افواج کے ہتھیاروں کی کمی پورا کرنے کے سلسلے میں خریدی گئی 72,400 رائفلوں میں سے افواجِ زمین کو 66,400، بھارتی فضائیہ کو 4,000 اور بحریہ کو 2,000 فراہم کی گئی تھیں۔ پہلے سے خریدی گئی یہ رائفلیں کشمیر اور شمال مشرق میں کنٹرول لائن کے ساتھ ساتھ دہشت گردی مخالف مہمات میں استعمال ہو رہی ہیں۔ بھارتی مسلح افواج کے پاس موجودہ وقت میں تقریباً 20 لاکھ ہتھیار استعمال میں ہیں۔ بھارتی فوج مختلف قسم کی اسالٹ رائفلیں استعمال کرتی ہے، جن میں انساس (انڈین اسمال آرمز سسٹم)، اے کے-47، سِگ سوئر 716 اوررائفلیں شامل ہیں۔ چھوٹے ہتھیاروں کی فہرست میں تقریباً 10 لاکھ انساس رائفلیں نمایاں حصہ ہیں۔

ہندوستھان سماچار

---------------

ہندوستان سماچار / عبدالواحد