سلطان پور، 14 اکتوبر (ہ س): ضلع کی فاسٹ ٹریک کورٹ-II نے منگل کو لوک سبھا میں اپوزیشن کے لیڈر اور ممبر پارلیمنٹ راہل گاندھی کو ایک بڑی راحت دی ہے۔ عدالت نے 2013 کے ایک مقدمے میں ان کے خلاف دائر نظرثانی کی درخواست کو خارج کر دیا۔

اکتوبر 2013 میں مدھیہ پردیش کے اندور میں ایک انتخابی ریلی کے دوران راہل گاندھی نے مظفر نگر فسادات کا حوالہ دیتے ہوئے ایک قابل اعتراض بیان دیا جس میں مسلم نوجوانوں پر پاکستانی خفیہ ایجنسی آئی ایس آئی سے روابط کا الزام لگایا۔ اس بیان کے حوالے سے ایڈووکیٹ محمد انور نے شکایت درج کرائی۔ اس وقت راہل گاندھی کانگریس پارٹی کے قومی نائب صدر تھے۔ اس معاملے میں شکایت کنندہ محمد انور کے ساتھ راجہ رام اپادھیائے اور وشال برنوال نے گواہی دی۔ اسپیشل مجسٹریٹ شبھم ورما نے 30 جنوری کو شکایت کو خارج کردیا۔ مجسٹریٹ عدالت کے اس فیصلے کے خلاف محمد انور نے ڈسٹرکٹ جج کی عدالت میں نظرثانی کی درخواست دائر کی۔

منگل کو راہل گاندھی کے وکیل کاشی پرساد شکلا نے اپنا کیس عدالت میں پیش کیا۔ دونوں طرف سے دلائل سننے کے بعد فاسٹ ٹریک کورٹ II کے جج راکیش سنگھ نے نظرثانی درخواست کو خارج کرنے کا حکم دیا۔

---------------

ہندوستان سماچار / عبدالسلام صدیقی