کراکاس، 14 اکتوبر (ہ س)۔ وینزویلا کی ریاست بولیوار میں شدید بارشوں کے بعد سونے کی کان منہدم ہونے سے کم از کم 14 افراد ہلاک ہو گئے ہیں۔ میڈیا رپورٹس کے مطابق حکام نے پیر کو بتایا کہ حادثہ ال کیلاؤ میونسپلٹی میں واقع سونے کی کان میں پیش آیا۔ دریں اثنا، نیشنل ڈیزاسٹر سسٹم کی ٹیموں نے بتایا کہ حادثے میں 14 افراد کی ہلاکت کی تصدیق کی گئی ہے۔ لاپتہ افراد کی تلاش کے لیے کوششیں جاری ہیں۔ کان کے مختلف حصوں سے 3 لاشیں نکال لی گئی ہیں جبکہ دیگر جاں بحق افراد کی لاشیں نکالنے کی کوششیں جاری ہیں۔ حکام نے سوشل میڈیا پر ایک پوسٹ میں کہا، ریسکیو آپریشن ابتدائی مرحلے میں ہے۔ پانی کی سطح کو کم کرنے کے لیے علاقے کے تمام شافٹ سے پانی نکالا جا رہا ہے۔ اس کے بعد ریسکیو کی کوششوں کا نئے سرے سے جائزہ لیا جائے گا۔

---------------

ہندوستان سماچار / عبدالسلام صدیقی