جموں, 13 اکتوبر (ہ س)۔ جموں پولیس نے امن و قانون کے قیام کو یقینی بنانے کے لیے ایک بڑی کارروائی انجام دیتے ہوئے ایک بدنامِ زمانہ مجرم کو پبلک سیفٹی ایکٹ کے تحت حراست میں لے لیا ہے۔

پولیس ترجمان کے مطابق، شبھم گل عرف مایا ولد ستیش کمار سکنہ ڈوگرا ہال جموں کو پکا ڈنگا پولیس اسٹیشن کی ٹیم نے گرفتار کیا اور تمام قانونی کارروائی مکمل کرنے کے بعد اسے ضلع جیل ادھم پور منتقل کر دیا گیا۔

ترجمان نے مزید بتایا کہ مذکورہ شخص متعدد سنگین جرائم، منشیات فروشی اور سماج دشمن سرگرمیوں میں ملوث رہا ہے، جس کی وجہ سے علاقے کے امن و امان کو خطرہ لاحق تھا۔

پولیس کے مطابق، شبھم گل کے خلاف کی گئی یہ کارروائی اس عزم کی عکاس ہے کہ امن، قانون اور عوامی تحفظ کو نقصان پہنچانے والے عناصر کو کسی صورت برداشت نہیں کیا جائے گا اور ان کے خلاف قانون کے تحت سخت ترین اقدامات کیے جائیں گے۔

ذرائع کے مطابق، پولیس کی جانب سے ایسے جرائم پیشہ افراد کی نشاندہی اور نگرانی کا سلسلہ جاری ہے تاکہ شہر میں پائیدار امن و امان قائم رکھا جا سکے۔

ہندوستھان سماچار

---------------

ہندوستان سماچار / محمد اصغر