وشاکھاپٹنم ،12اکتوبر (ہ س )۔

آندھرا کرکٹ ایسوسی ایشن (اے سی اے) نے اتوار کے روز ریاست کی دو سب سے کامیاب خواتین کرکٹرز میتالی راج اور روی کلپنا — کو وی سی اے-وی ڈی سی اے کرکٹ اسٹیڈیم میں بالترتیب ایک اسٹینڈ اور ایک گیٹ کے نام سے نوازا۔

افتتاح انفارمیشن ٹیکنالوجی، الیکٹرانکس، انفارمیشن ٹکنالوجی اور انسانی وسائل کی ترقی (آندھرا پردیش) کے وزیر نارا لوکیش نے، آئی سی سی کے صدر جے شاہ، اے سی اے کے صدر کیسینی سیوناتھ، اور کرکٹ کی دنیا کے کئی معززین کی موجودگی میں کیا۔ اس اہم موقع پر آئی سی سی کے سی ای او سنجوگ گپتا، کرکٹ آسٹریلیا کے چیئرمین مائیک بیئرڈ اور سی ای او ٹوڈ گرین برگ بھی موجود تھے۔

بی سی سی آئی کے صدر متھن منہاس، سکریٹری دیواجیت سائکیا، اور جوائنٹ سکریٹری پربھتیج بھاٹیہ بھی موجود تھے۔ آندھرا کرکٹ ایسوسی ایشن کی جانب سے سکریٹری ثنا ستیش بابو، نائب صدر بنڈارو نرسمہا راو¿، خزانچی دندامودی سری نواس، جوائنٹ سکریٹری بی وجے کمار، اور کونسلر دنتو گور وشنو تیج بھی موجود تھے۔

ہندوستان کی سب سے زیادہ سلجھی ہوئی خاتون کرکٹر، میتالی راج، خواتین کی بین الاقوامی کرکٹ میں سب سے زیادہ رنز بنانے والی کھلاڑی ہیں، جنہوں نے تمام فارمیٹس میں 10,868 رنز بنائے ہیں، جن میں سات سنچریاں اور 85 نصف سنچریاں شامل ہیں۔ 1999 میں بین الاقوامی سطح پر ڈیبیو کرنے کے بعد، میتالی نے ہندوستان کو دو ون ڈے ورلڈ کپ فائنل تک پہنچایا اور وہ واحد ہندوستانی خاتون کھلاڑی ہیں جنہوں نے 150 سے زیادہ ون ڈے میچوں میں قومی ٹیم کی کپتانی کی۔ 23 سال پر محیط ان کا شاندار کیریئر ہندوستان میں خواتین کی کرکٹ کی تشکیل میں اس کی عمدگی، مستقل مزاجی اور اہم کردار کا ثبوت ہے۔ وزیر نے میتالی کو ایک محدود ایڈیشن ہاتھ سے بنی سلور کرکٹ گیند پیش کی جس پر اے سی اے کا لوگو تھا۔

میتالی راج اسٹینڈ اور روی کلپنا گیٹ کی نقاب کشائی کرتے ہوئے، نارا لوکیش نے کہا، میتالی راج ہندوستانی کرکٹ میں صرف ایک نام نہیں ہے، بلکہ ایک ادارہ ہے۔ وہ ان لاکھوں نوجوان لڑکیوں کے لیے ایک حقیقی ٹریل بلیزر اور رول ماڈل رہی ہیں جو ہندوستانی ٹیم کے لیے کھیلنے کا خواب دیکھتی ہیں۔ آندھرا پردیش کے لیے یہ بڑے فخر کی بات ہے کہ اے سی اے ۔وی ڈی سی اے اسٹیڈیم کاایک اسٹینڈہمیشہ ان کے نام پر رہے گا۔ آندھرا حکومت ملک کے اب تک کے سب سے عظیم کرکٹروں میں سے ایک کو اعزاز سے سر فراز کرنے کے عزم پر کھری اتری ہے ۔ میں چاہتا ہوں کہ ہمارے ریاست سے سیکڑوں میتالی ابھریں اور اسی عزم کے ساتھ ملک کی خدمت کریں جو انہوں نے 23برسوں میں دکھائی ہے ۔

آئی سی سی کے چیئرمین جے شاہ نے کہا، میں آندھرا پردیش حکومت اور اے سی اے کو اس قابل تعریف اقدام پر مبارکباد پیش کرتا ہوں۔ میتالی راج کا سفر اور کامیابیاں پوری دنیا میں گونجتی ہیں، اس لیے ان کے نام پر اسٹینڈ کا نام دینا ان کی میراث کو حقیقی خراج تحسین ہے۔ مجھے یہ بھی یقین ہے کہ یہ اقدام خطے میں خواتین کی حمایت کو فروغ دے گا، کرکٹ میں نوجوان لڑکیوں کی حوصلہ افزائی کرے گا۔

اس اعزاز پر رد عمل ظاہر کرتے ہوئے میتالی راج نے کہا، وشاکھاپٹنم میں میرے نام سے منسوب اسٹینڈ رکھنا واقعی ایک اعزاز کی بات ہے۔ میں آندھرا حکومت، آندھرا کرکٹ ایسوسی ایشن اور اس کے عہدیداروں کا مجھے یہ اعزاز دینے کے لیے تہہ دل سے شکریہ ادا کرتی ہوں۔ وشاکھاپٹنم نے ہمیشہ میرے سفر میں ایک خاص مقام حاصل کیا ہے۔

روی کلپنا نے اظہار تشکر کرتے ہوئے کہا، خواب اس طرح بنتے ہیں۔ میری کپتان میتالی دیدی کے ساتھ اعزاز پانا وہ چیز ہے جس کا میں نے کبھی تصور بھی نہیں کیا تھا۔ میں عزت مآب وزیر نارا لوکیش گارو کا شکریہ ادا کرنا چاہتی ہوں۔ آندھرا پردیش نے غیر معمولی کارکردگی کا مظاہرہ کیا ہے۔ مجھے یقین ہے کہ آنے والے دنوں میں ہماری ریاست سے بہت سی مزید خواتین کو اعزاز سے نوازا جائے گا۔ اورلڑکیاں ملک کا نام روشن کریں گی۔

ہندوستھان سماچار

ہندوستان سماچار / عطاءاللہ