لکھنؤ، 14 نومبر (ہ س)۔ خواتین کرکٹ ورلڈ کپ میں اپنی شاندار کارکردگی سے سرخیوں میں رہنے والی ٹیم انڈیا کی آل راونڈر دیپتی شرما جمعہ کو اپنے آبائی ضلع لکھنؤ پہنچیں۔ شہر پہنچنے پر ان کا پرتپاک استقبال کیا گیا۔ اس کے بعد، انہوں نے اتر پردیش کے وزیر اعلی یوگی آدتیہ ناتھ اور پولیس کے ڈائریکٹر جنرل راجیو کرشنا سے بشکریہ ملاقات کی۔ میٹنگ کے دوران وزیر اعلیٰ نے دیپتی کی اسپورٹس مین شپ، نظم و ضبط اور حالیہ ورلڈ کپ میں ٹیم کی کامیابی میں ان کے فیصلہ کن کردار کی تعریف کی۔

دیپتی شرما نے میڈیا سے ایک مختصر بات چیت میں کہا کہ ورلڈ کپ کے دوران درپیش چیلنجز نے کھلاڑیوں کو مضبوط بنایا۔ انہوں نے بتایا کہ ٹورنامنٹ کا آغاز توقع کے مطابق نہیں ہوا، لیکن ٹیم نے متحد ہو کر واپسی کی اور ملک کے لیے ٹرافی جیتنا ایک قابل فخر لمحہ رہا۔

دیپتی نے کہا،”ہندوستانی شائقین کی حمایت اور ٹیم کے اعتماد نے مشکل حالات پر قابو پانے میں ہماری مدد کرنے میں کلیدی کردار ادا کیا۔ ہر کھلاڑی نے اپنا صد فیصد دیا اور یہی ہماری جیت کی بنیاد بنی۔“

آسٹریلیا جیسی مضبوط ٹیم کے خلاف ٹیم کی کارکردگی کا ذکر کرتے ہوئے انہوں نے کہا کہ فیصلہ کن میچوں میں صبر اور حکمت عملی نے ٹیم کا حوصلہ بلند کیا۔ لکھنو¿ پہنچ کر انہوں نے ریاست کے نوجوان کھلاڑیوں کو اپنے خوابوں کو حاصل کرنے کے لیے سخت محنت جاری رکھنے کی ترغیب دی۔ ورلڈ کپ جیتنے والے کھلاڑی کے استقبال کے لیے شہر میں جوش و خروش کا ماحول رہا اور کھیلوں کی کئی مقامی تنظیموں نے ان کے اعزاز میں تقریبات منعقد کرنے کی تیاریاں شروع کر دی ہیں۔

ہندوستھان سماچار

ہندوستان سماچار / محمد شہزاد