پٹنہ، 14 نومبر (ہ س)۔بہار اسمبلی انتخاب کے نتائج اب تقریباً صاف ہو چکے ہیں۔ این ڈی اے کو زبردست اکثریت ملی ہے۔ مہاگٹھ بندھن نے اس انتخاب میں اپنا پورا زور لگا دیا تھا، لیکن نتائج اس کے مطابق سامنے نہیں آ ئے۔ بی جے پی جہاں تن تنہا 90 سے زیادہ سیٹوں پر کامیاب ہوئی ہے، وہیں جنتا دل یو تقریباً 80 سے زائد سیٹوں پر کامیابی حاصل کی ہے ۔ابھی حتمی نتائج کا اعلان ہونا باقی ہے۔ این ڈی اے میں شامل ایل جے پی (رام ولاس) بھی تقریباً 22 سیٹیں جیت رہی ہے ۔ این ڈی اے کی دیگر پارٹیوں کو بھی جوڑ لیا جائے تو 200 سے زائد سیٹیں جیت رہے ہیں۔

اس درمیان نتائج کے اعلان سے پہلے ہی رجحانات سے خوش جنتا دل یو نے ایک بہت اہم اعلان کر دیا ہے۔ جنتا دل یو نے نتیش کمار کو وزیر اعلیٰ بنائے جانے کا اعلان سوشل میڈیا پلیٹ فارم ’ایکس‘ پر کیا ہے، جبکہ بی جے پی کی طرف سے وزیر اعلیٰ کے تعلق سے کچھ بھی بیان سامنے نہیں آیا ہے۔ دلچسپ بات یہ ہے کہ رجحانات میں جنتا دل یو کے مقابلے بی جے پی زیادہ اچھی کارکردگی پیش کی ہے۔جنتا دل یو نے ’ایکس‘ پر جاری اپنی پوسٹ میں لکھا ہے کہ ’’نہ ماضی، نہ مستقبل... نتیش کمار بہار کے وزیر اعلیٰ تھے، ہیں اور رہیں گے۔‘‘ اس پوسٹ کے ذریعہ جنتا دل یو نے حتمی انتخابی نتائج برآمد ہونے سے قبل ہی ایک طرح کا پیغام دینے کی کوشش کی ہے۔ وہ پیغام یہ ہے کہ نتیجوں میں بی جے پی بھلے ہی بڑی پارٹی بنے، لیکن وزیر اعلیٰ کے چہرہ نتیش کمار ہی ہوں گے۔ حالانکہ جنتا دل یو نے تھوڑی دیر بعد ہی یہ پوسٹ ڈیلیٹ کر دی ہے، لیکن اس کا اسکرین شاٹ سوشل میڈیا پر وائرل ہو رہا ہے۔دراصل بہار میں سیٹ شیئرنگ فائنل ہونے اور انتخابی نتائج سے قبل بی جے پی یہ بات لگاتار کہتی آ رہی ہے کہ انتخاب نتیش کمار کے چہرہ پر لڑا جا رہا ہے، لیکن وہ یہ کہنے سے پرہیز کرتی رہی ہے کہ این ڈی اے کی حکومت میں نتیش کمار ہی وزیر اعلیٰ ہوں گے۔ بی جے پی کے سرکردہ لیڈران ہمیشہ یہی کہتے رہے ہیں کہ قانون ساز پارٹی کی میٹنگ میں اراکین اسمبلی اپنے لیڈر کا انتخاب کریں گے اور وہی وزیر اعلیٰ بنے گا۔ہندوستھان سماچار

ہندوستان سماچار / Mohammad Afzal Hassan