چنڈی گڑھ، 12 نومبر (ہ س). اینٹی گینگسٹر ٹاسک فورس (اے جی ٹی ایف) پنجاب نے بٹالہ پولیس کے ساتھ مشترکہ کارروائی میں جگو بھگوان پوریا گینگ کے ایک سرگرم رکن کو گرفتار کر کے اس کے قبضے سے دو جدید پستول برآمد کر لیے ہیں۔

پولیس کے ڈائریکٹر جنرل (ڈی جی پی) گورو یادو نے بدھ کو بتایا کہ گرفتار ملزم کی شناخت گورلو سنگھ عرف لو رندھاوا کے طور پر ہوئی ہے، جو اجاگر نگر، بٹالہ کا رہنے والا ہے۔ برآمد کیے گئے اسلحے میں ایک زیگانہ پستول میگزین اور تین زندہ کارتوس، اور ایک .30 بور پستول بمعہ دو میگزین اور 13 زندہ کارتوس شامل ہیں۔

ڈی جی پی گورو یادو نے بتایا کہ ابتدائی تحقیقات سے پتہ چلا ہے کہ گرفتار کیا گیا بدمعاش اپنے غیر ملکی ہینڈلر امرت دالم کی ہدایت پر کام کر رہا تھا۔ انہوں نے کہا کہ کیس میں دیگر تار کو جوڑنے کے لیے مزید تفتیش جاری ہے۔

اے جی ٹی ایف کے ایڈیشنل ڈائریکٹر جنرل آف پولیس (اے ڈی جی پی) پرمود بان نے بتایا کہ ایک مخصوص اطلاع پر کارروائی کرتے ہوئے، اے جی ٹی ایف کے ڈی ایس پی راجن پرمیندر کی قیادت میں پولیس ٹیموں نے بٹالہ پولیس کے ساتھ مشترکہ کارروائی میں، بٹالہ کے 60 فٹ قادیاں روڈ کے ٹی پوائنٹ سے گرلو سنگھ عرف لو رندھاوا کو گرفتار کیا۔

بٹالہ کے سینئر سپرنٹنڈنٹ پولیس (ایس ایس پی) سہیل قاسم میر نے بتایا کہ گرفتار گرلو عرف لو رندھاوا کا مجرمانہ ریکارڈ ہے اور وہ اسلحہ ایکٹ، چوری، دھوکہ دہی اور انسانی جان کو خطرے میں ڈالنے کے مقدمات میں ملوث ہے۔ انہوں نے کہا کہ مزید تحقیقات جاری ہیں۔

ہندوستھان سماچار

ہندوستان سماچار / محمد شہزاد