بھوپال، 23 نومبر (ہ س)۔

مدھیہ پردیش کے شیوپور ضلع کے وجئے پور اسمبلی ضمنی انتخاب میں بی جے پی کو بڑا جھٹکا لگا ہے۔ پارٹی نے ریاستی حکومت میں وزیر جنگلات رامنیواس راوت کو ٹکٹ دیا تھا۔ کانگریس کے مکیش ملہوترا نے انہیں سات ہزار سے زیادہ ووٹوں سے شکست دی۔ تاہم ابھی تک ضمنی انتخاب کے سرکاری نتائج کا اعلان نہیں کیا گیا ہے۔ دوسری طرف بی جے پی نے دوبارہ گنتی کا مطالبہ کیا ہے۔

وجئے پور اسمبلی ضمنی انتخاب کے لئے ووٹوں کی گنتی ہفتہ کو پولی ٹیکنک کالج شیوپور میں ہوئی۔ گنتی کے پہلے دور میں کانگریس کو 178 ووٹوں کی برتری حاصل ہوئی۔ پہلے راونڈ میں کانگریس کے مکیش ملہوترا کو 4049 ووٹ ملے اور بی جے پی کے رامنیواس راوت کو 3871 ووٹ ملے۔ اس کے بعد بی جے پی دوسرے سے 15ویں راونڈ تک مسلسل آگے رہی۔ آٹھویں راونڈ تک بی جے پی کی برتری 8661 ووٹوں تک پہنچ گئی تھی۔ تاہم نویں راونڈ میں اس برتری میں قدرے کمی واقع ہوئی۔ اس کے بعد 15ویں راونڈ کے بعد رجحان میں بڑا الٹ پلٹ دیکھنے میں آیا، جب کانگریس کو 3547 ووٹوں کی برتری حاصل ہوئی، جس کی وجہ سے بی جے پی کی برتری کم ہو کر 1496 رہ گئی۔ اس کے بعد 16ویں راونڈ میں کانگریس 1842 ووٹوں سے آگے چلی گئی اور 17ویں راونڈ میں یہ برتری بڑھ کر 4747 ووٹوں تک پہنچ گئی۔ اس کے بعد بی جے پی اس برتری پر عبور نہیں کرسکی

وجئے پور ضمنی انتخاب میں ووٹوں کی گنتی کے 20ویں راونڈ کے بعد کانگریس امیدوار مکیش ملہوترا نے 6523 ووٹوں کی برتری حاصل کر لی تھی۔ اس راونڈ تک کانگریس کو 97 ہزار 318 ووٹ ملے تھے اور بی جے پی امیدوار رامنیواس راوت کو 90 ہزار 795 ووٹ ملے تھے۔ اس کے بعد آخری 21ویں راونڈ میں کانگریس امیدوار نے سات ہزار سے زیادہ ووٹوں سے کامیابی حاصل کی۔ کانگریس کے مکیش ملہوترا نے 7 ہزار 228 ووٹوں سے کامیابی حاصل کی ہے۔

گزشتہ انتخابات میں وجئے پور سے رکن اسمبلی منتخب ہونے والے رامنواس راوت کے کانگریس چھوڑ کر بی جے پی میں شامل ہونے کے بعد رکن اسمبلی کے عہدے سے استعفیٰ دینے کی وجہ سے یہاں ضمنی انتخاب ہوا۔ انہیں بی جے پی کی موہن یادو حکومت میں کابینی وزیر بنایا گیا تھا۔ وجئے پور میں 13 نومبر کو ووٹنگ ہوئی تھی۔ انتخابی میدان میں 11 امیدوار تھے۔ وجئے پور اسمبلی حلقہ کے ووٹوں کی گنتی کے لیے 16 ٹیبل لگائے گئے تھے، جن پر ای وی ایم میں ڈالے گئے ووٹوں کی گنتی کی گئی۔ ہر ٹیبل کے لیے ایک کاونٹنگ سپروائزر اور ایک کاونٹنگ اسسٹنٹ مقرر کیا گیا تھا۔ اس کے ساتھ ساتھ ہر کاونٹنگ ٹیبل پر مائیکرو آبزرور بھی تعینات کیے گئے تھے۔

13 نومبر کو وجئے پور اسمبلی حلقہ کے 327 پولنگ اسٹیشنوں پر 77.76 فیصد ووٹنگ ہوئی تھی۔ اسمبلی حلقہ میں کل 2 لاکھ 54 ہزار 714 ووٹر تھے۔ جن میں سے 1 لاکھ 5 ہزار 713 مرد ووٹرز اور 92 ہزار 357 خواتین ووٹرز نے ووٹ ڈالا۔ کل 1 لاکھ 98 ہزار 71 ووٹ ڈالے گئے۔ تیسری جنس کی طرف سے بھی 1 ووٹ ڈالا گیا۔ 79.14 فیصد مردوں اور 76.25 فیصد خواتین نے ووٹ ڈالا۔

ہندوستھان سماچار

ہندوستان سماچار / انظر حسن