نیشنل مونومینٹس اتھارٹی نے اپنا 14واں یوم تاسیس منایا

نئی دہلی، 23 نومبر (ہ س)۔

مرکزی ثقافت اور سیاحت کے وزیر گجیندر سنگھ شیخاوت نے ہفتہ کو کہا کہ ہندوستان کی ثقافتی طاقت آج کی مسابقتی دنیا میں ایک الگ مقام رکھتی ہے۔ تکنیکی، اقتصادی اور تزویراتی قوتوں کے درمیان ہندوستان کی ثقافتی طاقت نہ صرف دنیا میں اس کے منفرد مقام کی نشاندہی کرتی ہے بلکہ اپنے ورثے کو وقار کے ساتھ محفوظ رکھنے میں بھی مدد کرتی ہے۔ گجیندر سنگھ شیخاوت نے ثقافتی ورثہ کے تحفظ کے لیے سائنسی نقطہ نظر اپنانے کی اہمیت پر زور دیا تاکہ شہریوں کی روزمرہ کی زندگی میں کم سے کم مشکلات کا سامنا ہو۔ ہفتہ کو وہ بھارت منڈپم میں وزارت ثقافت کے تحت نیشنل مونومنٹس اتھارٹی (این ایم اے) کے 14ویں یوم تاسیس کی تقریب سے خطاب کر رہے تھے۔

اس موقع پر گجیندر سنگھ شیخاوت نے کہا کہ سال 2014 تک ملک کے مالامال ورثے کو کمزور کرنے کی منظم کوشش کی گئی۔ انہوں نے کہا کہ اس دور میں ہندوستانیوں کو یہ باور کرانے کی کوشش کی گئی کہ ان کا فن، ثقافت، فن تعمیر، سائنس اور علم مغربی روایات سے کمتر ہے۔ لیکن گزشتہ 10 سالوں میں وزیراعظم کی قیادت میں قوم کی ترقی اور اپنے ورثے کے تحفظ دونوں کو ترجیح دی گئی ہے۔ اس سے ہندوستان کے ثقافتی ورثے کی عالمی شناخت اور احترام ہوا ہے۔

شیخاوت نے اعتراف کیا کہ این ایم اے نے اپنے چودہ سال کے آپریشن میں نمایاں کامیابیاں حاصل کی ہیں۔ انہوں نے اعتماد کا اظہار کیا کہ اتھارٹی ان کامیابیوں پر تعمیر جاری رکھے گی، جس سے ہندوستان کے ورثے کے انتظام کے نظام کو مزید تقویت ملے گی۔

تقریب کے افتتاحی اجلاس میں مرکزی وزیر کے ساتھ نیشنل مونومنٹس اتھارٹی کے چیئرمین پروفیسر کشور کے بھی موجود تھے۔

ہندوستھان سماچار

ہندوستان سماچار / عطاءاللہ