علی گڑھ، 21 نومبر (ہ س)۔ اترپردیش میں علی گڑھ ضلع کے ٹپل تھانہ علاقے میں یمنا ایکسپریس وے پر بدھ کی رات دیر گئے ایک ٹرک اور ایک ڈبل ڈیکر بس میں تصادم ہوا۔ حادثے میں 5 افراد جاں بحق اور 15 زخمی ہوگئے۔ واقعہ کا نوٹس لیتے ہوئے وزیر اعلیٰ یوگی آدتیہ ناتھ موقع پر پہنچے اور افسران کو کارروائی کی ہدایات دیں۔ پولیس کے مطابق پرتاپ گڑھ کے کرشنا ٹریولس کی ڈبل ڈیکر بس دہلی سے اعظم گڑھ جا رہی تھی۔ ٹپل تھانہ علاقے میں یمنا ایکسپریس وے پر بس ایک ٹرک سے ٹکرا گئی۔ حادثے میں جاں بحق ہونے والوں میں ایک خاتون، تین مرد اور ایک بچہ شامل ہے۔ ان میں پارول (25)، اس کا پانچ ماہ کا بیٹا آروہ، پرتاپ گڑھ کے ہس مکھ سروج اور دو نامعلوم افراد شامل ہیں۔ پولیس نے لاشوں کو پوسٹ مارٹم کے لیے بھجوا دیا اور زخمیوں کو علاج کے لیے ہسپتال داخل کرا دیا۔ علی گڑھ میں سڑک حادثہ کا نوٹس لیتے ہوئے وزیر اعلیٰ یوگی آدتیہ ناتھ نے مہلوکین کے سوگوار خاندانوں سے تعزیت کا اظہار کیا ہے۔ وزیراعلیٰ نے ضلعی انتظامیہ کے حکام کو ہدایت کی ہے کہ وہ زخمیوں کو فوری طور پر ہسپتال لے جائیں اور انہیں مناسب علاج فراہم کیا جائے۔
---------------
ہندوستان سماچار / عبدالسلام صدیقی
