واشنگٹن ، 18 ستمبر (ہ س)۔

امریکی ریاست نیوادا کے شہر رینو میں منعقدہ ایئر شو میں دو طیارے آپس میں ٹکرا گئے۔ اس تصادم میں دونوں طیاروں کے پائلٹ ہلاک ہوگئے۔امریکی ریاست نیوادا کے شہر رینو میں طیاروں کی دوڑ اور ایکروبیٹکس کے قومی مقابلے کا انعقاد کیا گیا۔ پچھلے پچاس سالوں سے منعقد ہونے والا رینو ایئر شو امریکہ کے پریمیئر ایئر شو ایونٹس میں سے ایک ہے۔ ہر سال اوسطاً ایک لاکھ سے زیادہ لوگ اس ایئر شو کو دیکھنے آتے ہیں۔ اس بار بھی ایئر شو پورے جوش و خروش کے ساتھ جاری تھا ، جب یہ حادثہ پیش آیا۔

رینو ایئر ریسنگ ایسوسی ایشن نے بتایا کہ ٹی- 6 گولڈ ریس کے فائنل کے دوران لینڈنگ کے دوران دو طیارے آپس میں ٹکرا گئے۔ طیاروں کے درمیان تصادم اتنا زوردار تھا کہ دونوں طیاروں کے پرزے اچھل کر کئی کلومیٹر دور جا گرے۔ حادثے میں دونوں طیاروں کے پائلٹ کے ہلاک ہونے کی بھی تصدیق کی گئی ہے۔رینو ایئر ریسنگ ایسوسی ایشن نے ایک بیان میں کہا کہ حادثے میں ہلاک ہونے والے پائلٹوں کی شناخت نک میکی اور کرس رشنگ کے نام سے ہوئی ہے۔ بیان میں کہا گیا ہے کہ دونوں پائلٹ ہنر مند ہوا باز اور ٹی- 6 کیٹیگری میں گولڈ میڈل جیتنے والے تھے۔ دونوں پائلٹس کے اہل خانہ کو مطلع کر دیا گیا ہے۔ حادثے کے بعد ایئر شو منسوخ کر دیا گیا ہے۔ امریکہ کی فیڈرل ایوی ایشن ایڈمنسٹریشن کے نیشنل ٹرانسپورٹیشن سیفٹی بورڈ نے حادثے کی تحقیقات شروع کر دی ہیں۔ طیاروں کے ملبے کی تحقیقات کی جا رہی ہیں۔ حادثے کی وجہ جاننے کے لیے تحقیقات میں کوششیں کی جا رہی ہیں۔

ہندوستھان سماچارمحمدخان