کاٹھمنڈو، 9 دسمبر (ہ س)۔ نیپال کی فوج اور ہندوستانی فوج کے درمیان مشترکہ فوجی مشقیں اختتام پذیر ہوگئیں۔ مشق کا معائنہ کرنے والے نیپالی فوج کے مبصر وفد کی قیادت نیپالی فوج کے اپرتھی انوپجنگ تھاپا نے کی۔

25 نومبر کو بھارت کے پتھورا گڑھ میں شروع ہونے والی مشترکہ فوجی مشق سوریہ کرن کا 19 ویں ایڈیشن 8 دسمبر کو اختتام پذیر ہوا۔ مشق 2010 سے نیپال اور بھارت میں باری باری سے منعقد کی جا رہی ہے۔ مشق میں مختلف موضوعات پر مشترکہ تربیت شامل تھی، جن میں ڈیزاسٹر مینجمنٹ، انسداد شورش کی کارروائیاں، انسداد دہشت گردی، انسانی حقوق کی تربیت شامل تھی۔

صلاحیتوں میں اضافے کے مقصد سے نیپالی فوج ہندوستانی فوج کے علاوہ امریکہ، برطانیہ، چین سمیت دوست ممالک کی فوجوں کے ساتھ مختلف دو طرفہ اور کثیر جہتی فوجی مشقوں اور پیشہ ورانہ مقابلوں میں مسلسل حصہ لے رہی ہے۔

---------------

ہندوستان سماچار / عبدالسلام صدیقی