پٹنہ، 9 دسمبر(ہ س)۔بہار حکومت کا محکمہ زراعت ریاست میں تیلہن کی پروسیسنگ اور تیل نکالنے کو فروغ دینے کے لیے مسلسل کام کر رہا ہے۔ اس سلسلے میں محکمہ زراعت نے آئل ملوں کے قیام کے لیے پرکشش اسکیم شروع کی ہے۔ اس اسکیم کے تحت محکمہ آئل مل لگانے کے لیے 33 فیصد سبسڈی دے رہا ہے۔

اس کے لیے http://dbtagriculture.bihar.gov.in پرجا کر 15 دسمبر تک آن لائن درخواست دینی ہوگی۔ حکومت کے اس اقدام سے ریاست میں تیلہن کی پروسیسنگ اور پیداوار میں اضافہ ہوگا۔ کسان اور نوجوان اس اسکیم سے فائدہ اٹھا سکتے ہیں تاکہ وہ خود کو بہتر طور پر روزگار میں شامل کر سکیں۔ یہ اسکیم ان نوجوانوں کے لیے ایک موقع فراہم کرتی ہے جو اپنے خوابوں کو پورا کرنے کے لیے کاروباری بننے کی خواہش رکھتے ہیں۔

محکمے کی جانب سے دی جارہی گرانٹ امداد 10 ٹن آئل پروسیسنگ یونٹ کے قیام کے لیے زیادہ سے زیادہ 990,000 روپے فی یونٹ یا پروجیکٹ لاگت کا33فیصد سبسڈ ی ملے گی۔ تاہم، زمین کی خریداری یا عمارت/شیڈ کی تعمیر کے لیے کوئی مدد فراہم نہیں کی جائے گی۔ ان اخراجات کو سبسڈی کا حساب لگانے کے لیے پروجیکٹ کی لاگت سے خارج کر دیا جائے گا۔

کسان، سرکاری یا نجی صنعتیں، فارمر پروڈیوسر گروپ (ایف پی او ) سمیت تیلہن میں شامل رجسٹرڈ اسٹارٹ اپس، اور تیل کے بیجوں کی پروسیسنگ میں شامل کوآپریٹیو درخواست دے سکتے ہیں۔ آن لائن درخواستیں 3 دسمبر سے شروع ہے، اور آخری تاریخ 15 دسمبر ہے۔ درخواست دہندگان کو آئل پروسیسنگ کی بنیادی معلومات اور دیگر مطلوبہ دستاویزات آن لائن اپ لوڈ کرنا ہوں گی۔ مزید معلومات ڈسٹرکٹ ایگریکلچر آفس سے حاصل کی جا سکتی ہیں۔

ہندوستھان سماچار

ہندوستان سماچار / Mohammad Afzal Hassan