۔ انل امبانی نے ڈیجیٹل ذرائع سے ای ڈی کے سامنے پیش ہونے کی پیشکش کی تھی

نئی دہلی، 14 نومبر (ہ س)۔ انفورسمنٹ ڈائریکٹوریٹ (ای ڈی) نے ریلائنس اے ڈی اے جی گروپ کے چیئرمین انل ڈی امبانی کی ورچوئل وسیلے سے پوچھ گچھ کے لیے حاضر ہونے کی درخواست کو مسترد کر دیا ہے۔ امبانی کو آج پوچھ گچھ کے لیے طلب کیا گیا تھا لیکن وہ ذاتی طور پر حاضر نہیں ہوئے۔

سرکاری ذرائع نے بتایا کہ ریلائنس گروپ کے چیئرمین انل امبانی دوسرے دور کی پوچھ گچھ کے لیے مرکزی تحقیقاتی ایجنسی کے دہلی دفتر میں حاضر ہونے میں ناکام رہے۔ مرکزی تحقیقاتی ایجنسی نے انہیں ورچوئل طور پر پیش ہونے کی اجازت نہیں دی،جبکہ صنعت کار نے آن لائن پوچھ گچھ کی کارروائی میں حصہ لینے کی خواہش ظاہر کرتے ہوئے ایک ای- میل بھیجا تھا۔

انل امبانی (66) کے ترجمان نے ایک بیان میں کہا کہ انہوں نے مرکزی تفتیشی ایجنسی کو خط لکھ کر فارن ایکسچینج مینجمنٹ ایکٹ (فیما) کے تحت ہونے والی تحقیقات میں مکمل تعاون کی یقین دہانی کرائی ہے۔ انل امبانی نے کہا کہ وہ ورچوئل طریقے سے پیش ہونے کے لیے تیار ہیں اور تمام معاملات میں ای ڈی کے ساتھ مکمل تعاون کریں گے۔ انہوں نے یہ بھی واضح کیا کہ یہ سمن منی لانڈرنگ کی روک تھام کے قانون (پی ایم ایل اے) کے تحت کسی تحقیقات کے بجائے فارن ایکسچینج مینجمنٹ ایکٹ (فیما) کے تحت ہونے والی تحقیقات سے متعلق ہے ۔

ہندوستھان سماچار

ہندوستان سماچار / محمد شہزاد