بھوپال، 12 نومبر (ہ س)۔ مدھیہ پردیش اس بار نومبر مہینے کے آغاز ہی میں غیر متوقع طور پر شدید سردی کی زد میں آ گیا ہے۔ عموماً صوبے میں سردی نومبر کے وسط یا آخر میں پڑتی ہے، لیکن اس بار موسم نے پہلے ہی ایسا تیور دکھایا کہ لوگوں کو حیرانی ہوئی۔ دارالحکومت بھوپال، اندور، شہڈول اور جبلپور میں شدید سرد لہر کا اثر دیکھا جا رہا ہے، جبکہ راج گڑھ، سیہور، شاجاپور، ریوا اور ملا جکھنڈ میں بھی سردی کا اثر قائم ہے۔
موسم سائنسدانوں کے مطابق، پورے صوبے کا ماحول خشک ہے اور آسمان صاف ہونے کی وجہ سے رات کا درجہ حرارت معمول سے کافی کم رہا ہے۔ راتیں اور صبح کا موسم انتہائی سرد ہونے کے سبب لوگوں کو پریشانی ہو رہی ہیں۔ محکمہ موسمیات نے بتایا کہ یہ صورتحال اگلے دو سے تین دن تک برقرار رہ سکتی ہے۔ منگل کو راج گڑھ میں رات کا درجہ حرارت ریکارڈ آٹھ ڈگری سیلسیس تک گر گیا۔ صوبے کے 30 شہروں میں کم از کم درجہ حرارت 15 ڈگری سیلسیس سے کم ریکارڈ کیا گیا۔ بھوپال، اندور اور شہڈول میں شدید سرد لہر کا اثر رہا، جبکہ راج گڑھ، سیہور، شاجاپور، ریوا اور ملا ج کھنڈ میں سرد لہر کی صورتحال برقرار ہے۔
قابل ذکر ہے کہ اس سال نومبر کے پہلے ہفتے سے ہی مدھیہ پردیش میں سردی کا سلسلہ جاری ہے۔ دن میں سرد ہوائیں چل رہی ہیں اور راتیں انتہائی سرد ہیں۔ دارالحکومت بھوپال میں نومبر کا کم از کم درجہ حرارت 8 ڈگری سیلسیس تک پہنچ گیا، جو پچھلے 10 سال میں سب سے کم ہے۔ اندور میں درجہ حرارت 7 ڈگری تک پہنچ گیا، جو پچھلے 25 سال میں نومبر کا اب تک کا سب سے کم درجہ حرارت ہے۔
بھوپال موسم سائنس سینٹر کے مطابق اس بار ہمالیہ کے علاقے میں ویسٹرن ڈسٹربنس ایک ہفتہ پہلے ہی فعال ہو گئے۔ اس کا اثر شمال سے جنوب کی جانب چل رہی ہوا کے ساتھ مدھیہ پردیش تک پہنچا، جس سے سردی کا اثر شدید ہو گیا۔ موسمیاتی مرکز نے بتایا کہ پاکستان اور اس کے گرد و نواح کے علاقوں میں ہوا کے بالائی حصے میں ایک ویسٹرن ڈسٹربنس گرداب کے طور پر موجود ہے۔ صوبے کے ارد گرد کے دیگر ریاستوں میں بھی سردی پڑ رہی ہے، لیکن مدھیہ پردیش کے کئی شہروں میں درجہ حرارت ہماچل پردیش اور اتراکھنڈ کے شہروں سے بھی کم ریکارڈ کیا گیا۔
ہندوستھان سماچار
---------------
ہندوستان سماچار / انظر حسن
