نئی دہلی، 12 نومبر (ہ س)۔ صدرجمہوریہ دروپدی مرمو نے بوتسوانا کے صدر ڈیوما گیڈین بوکا کے ساتھ گابورون میں بات چیت کی اور تجارت، صحت، تعلیم، دفاع، ڈیجیٹل ٹیکنالوجی اور جنگلی حیات کے تحفظ جیسے شعبوں میں تعاون بڑھانے پر اتفاق کیا۔ میٹنگ کے دوران صدر مرمو نے 'پروجیکٹ چیتا' کے اگلے مرحلے کے تحت چیتاوں کو ہندوستان بھیجنے پر بوتسوانا کا شکریہ ادا کیا۔

صدر کے سیکرٹریٹ کے مطابق یہ ہندوستان سے بوتسوانا کا پہلا صدارتی دورہ ہے۔ صدر مرمو انگولا اور بوتسوانا کے اپنے سرکاری دورے کے آخری مرحلے میں پیر (11 نومبر 2025) کو گوبورون پہنچے۔ ان کے ساتھ آبی بجلی اور ریلویز کے وزیر مملکت وی سومن اور ممبران پارلیمنٹ پربھو بھائی نگر بھائی وساوا اور ڈی کے ارونابھی موجود تھے۔

بات چیت کے دوران دونوں ممالک نے تجارت اور سرمایہ کاری، زراعت، قابل تجدید توانائی، مہارت کی ترقی اور دفاعی تعاون کو نئی تحریک دینے پر زور دیا۔ صدر مرمو نے کہا کہ ہندوستان بوٹسوانا کے ساتھ اپنے تعلقات کو مزید گہرا کرنے کے لئے پرعزم ہے اور افریقہ کے ساتھ شراکت داری کو مضبوط بنانے کے لئے ہندوستان-افریقہ فورم سمٹ کے فریم ورک کے اندر مل کر کام کرے گا۔

ہندوستان کو جمہوریت کی ماں قرار دیتے ہوئے صدر بوکو نے کہا کہ ہندوستان نے ہمیشہ بوتسوانا کی ترقی کے لیے تحریک اور مدد فراہم کی ہے۔ انہوں نے تعلیم، صنفی مساوات اور سماجی ترقی میں صدر مرمو کی کوششوں کی ستائش کی۔

اس موقع پر دونوں ممالک کے درمیان فارماکوپیا (ڈرگ کوڈ) پر ایک معاہدے پر دستخط کیے گئے، جس سے بوتسوانا کے شہریوں کو اعلیٰ معیار کی اور سستی ہندوستانی ادویات کی آسانی سے رسائی ممکن ہو گی۔ بھارت نے بوتسوانا کی درخواست پر اینٹی ریٹرو وائرل (اے آر وی) ادویات کی فراہمی کا بھی اعلان کیا۔

صدر مرمو نے کہا کہ یہ دورہ دونوں ممالک کے تعلقات کی تاریخ میں خاص طور پر سال 2026 میں سفارتی تعلقات کی 60 ویں سالگرہ کے پیش نظر ایک اہم سنگ میل ہے۔

---------------

ہندوستان سماچار / عبدالسلام صدیقی