ڈھاکہ، 12 نومبر (ہ س)۔

بنگلہ دیش نے بھارتی میڈیا کی ان رپورٹس کو واضح طور پر مسترد کر دیا ہے جس میں دعویٰ کیا گیا تھا کہ پاکستان میں مقیم دہشت گرد گروپ لشکر طیبہ کے سربراہ حافظ سعید نے بھارت میں حملوں کی منصوبہ بندی کے لیے بنگلہ دیشی سرزمین استعمال کی۔

بنگلہ دیش کے خارجہ امور کے مشیر محمد توحید حسین نے منگل کی شام یہاں وزارت خارجہ میں صحافیوں سے بات کرتے ہوئے کہا، چاہے کچھ بھی ہو جائے، میڈیا ہم پر الزام لگانے کی کوشش کرے گا۔ لیکن اس پر یقین کرنے کی کوئی وجہ نہیں ہے۔ کوئی سمجھدار شخص ایسا نہیں کرے گا۔

ایک اور سوال کے جواب میں انہوں نے کہا کہ اقوام متحدہ نے سابق وزیراعظم شیخ حسینہ کی نمائندگی کرنے والے لندن میں مقیم برطانیہ کے دو وکلاء کی طرف سے بنگلہ دیش کے انٹرنیشنل کریمنل ٹریبونل (آئی سی ٹی) میں جاری مقدمے کے حوالے سے بھیجے گئے خط پر کوئی تبصرہ جاری نہیں کیا ہے۔ حسینہ اور دیگر تین افراد پر انسانیت کے خلاف جرائم کا الزام ہے۔ برطانوی وکلاء نے اقوام متحدہ میں اپیل میں آئی سی ٹی ٹرائل کی غیر جانبداری کو چیلنج کیا ہے۔

دریں اثنا، جب چین سے بنگلہ دیش کی اسلحے کی خریداری پر ممکنہ امریکی پابندیوں کے بارے میں پوچھا گیا تو مشیر نے کہا، ہم کسی فریق کے حق میں نہیں ہیں۔ ہم سب کے ساتھ متوازن تعلقات برقرار رکھتے ہیں، اور ہم ایسا کرتے رہیں گے۔ مجھے نہیں لگتا کہ ہمیں کسی پابندی کا سامنا کرنا پڑے گا۔

ہندوستان سماچار / عطاءاللہ