جموں, 12 نومبر (ہ س)۔ جموں اینٹی نارکوٹکس ٹاسک فورس نے ایک بڑی کارروائی کے دوران 500 گرام اعلیٰ معیار کی ہیروئن برآمد کر کے ایک بین ریاستی منشیات اسمگلر کو گرفتار کر لیا۔سرکاری بیان کے مطابق، خفیہ اور مصدقہ اطلاع پر کارروائی کرتے ہوئے اے این ٹی ایف جموں کی ٹیم نے ایک اہم کامیابی حاصل کی، جس دوران تقریباً 500 گرام ہیروئن ضبط کی گئی اور منشیات کی غیر قانونی اسمگلنگ میں ملوث ایک شخص کو گرفتار کیا گیا۔

کارروائی کے دوران مشتبہ شخص کو مسلسل نگرانی اور مصدقہ انٹیلی جنس اطلاعات کی بنیاد پر حراست میں لیا گیا۔ گرفتار ملزم کی شناخت محمد پرویز ولد محمد شہید سکنہ جعفرآباد، شمال مشرقی دہلی کے طور پر ہوئی ہے۔ تلاشی کے دوران اُس کے قبضے سے تقریباً 500 گرام ہیروئن برآمد کی گئی۔

پولیس کے مطابق، اس سلسلے میں ایف آئی آر نمبر 03/2025 زیرِ دفعات 8/21/22 این ڈی پی ایس ایکٹ تھانہ جموں میں درج کر لی گئی ہے اور منشیات کے اس نیٹ ورک کے پیچھے موجود روابط اور سپلائی چین کی نشاندہی کے لیے مزید تحقیقات جاری ہیں۔ابتدائی تحقیقات سے انکشاف ہوا ہے کہ گرفتار شخص ایک بڑے منشیات نیٹ ورک کا حصہ ہے جو جموں و کشمیر کے اندر مقامی ڈیلروں تک نشہ آور مواد پہنچانے کے لیے دیگر ریاستوں سے سپلائی کرتا تھا۔اے این ٹی ایف نے نیٹ ورک کے دیگر ارکان کی شناخت اور منشیات کے منبع و منزل کا سراغ لگانے کے لیے تفتیش کو وسعت دے دی ہے۔

محکمہ نے عوام سے اپیل کی ہے کہ وہ منشیات کی اسمگلنگ سے متعلق کسی بھی معلومات کو پولیس کے ساتھ شیئر کریں تاکہ جموں و کشمیر کو منشیات سے پاک بنانے کے مشن میں تعاون فراہم کیا جا سکے۔

ہندوستھان سماچار

---------------

ہندوستان سماچار / محمد اصغر