ایم پی میں نومبر کی شروعات بارش اور سردی کے ساتھ، محکمہ موسمیات نے کئی اضلاع کے لیے الرٹ جاری کیا

بھوپال، یکم نومبر (ہ س)۔ مدھیہ پردیش میں نومبر کا آغاز اس بار بھی بارش اور سردی کے امتزاج کے ساتھ ہو رہا ہے۔ گزشتہ 10 برسوں بعد نومبر کا مہینہ ریاست میں سردی اور بارش کے ساتھ آیا ہے۔ اس بار بھی محکمہ موسمیات نے پہلے ہفتے میں تیز بارش کا الرٹ جاری کیا ہے۔ ہفتہ کو ہندوستانی محکمہ موسمیات (آئی ایم ڈی) نے رتلام، جھابوا، علیراج پور اور بڑوانی اضلاع میں شدید بارش کی وارننگ جاری کی ہے۔ محکمہ کے مطابق، ان اضلاع میں اگلے 24 گھنٹوں میں تقریباً ساڑھے چار انچ تک پانی گرنے کا امکان ہے۔

دارالحکومت بھوپال میں بادل چھائے رہیں گے اور شام کے وقت ہلکی بارش کی توقع ہے۔ جبکہ نیمچ، مندسور، اجین، اندور، کھرگون، برہان پور، شیوپور، مرینا، چھندواڑا، پانڈھرنا، سیونی، منڈلا اور بالا گھاٹ میں ہلکی بارش کا سلسلہ جاری رہے گا۔ موسمی ماہرین کا کہنا ہے کہ نومبر کے پہلے ہفتے میں بارش جاری رہے گی، جبکہ دوسرے ہفتے سے شمالی ہوائیں چلنے لگیں گی، جس سے سردی میں تیزی آئے گی۔

قابل ذکر ہے کہ اکتوبر کا مہینہ اس بار بارش کے لحاظ سے کافی سرگرم رہا۔ پوری ریاست میں اوسطاً 2.8 انچ بارش ریکارڈ کی گئی، جو معمول کے 1.3 انچ سے 121 فیصد زیادہ تھی۔ یہ اکتوبر مہینے کی اوسط بارش سے دگنی تھی۔ اس دوران دن کے درجہ حرارت میں شدید کمی دیکھی گئی۔ بھوپال کا زیادہ سے زیادہ درجہ حرارت 24 ڈگری سیلسیس تک گر گیا، جو گزشتہ 25 سالوں میں سب سے کم ہے۔ اجین، چھترپور، نرسنگھ پور سمیت کئی اضلاع میں بھی دن کا درجہ حرارت 24 ڈگری سے نیچے ریکارڈ کیا گیا۔

محکمہ موسمیات کے مطابق، جبل پور، منڈلا، ڈنڈوری، نرسنگھ پور، بالا گھاٹ اور سیونی اضلاع میں اگلے 24 گھنٹوں کے دوران ہلکی بارش یا بوندا بانددی کا امکان ہے۔ دن کے وقت دھوپ اور بادل کے درمیان درجہ حرارت میں ہلکا اتار چڑھاو رہے گا، جس کی وجہ سے رات کو ہلکی نمی محسوس ہو سکتی ہے۔ تین نومبر سے بادل چھٹنے کا امکان ہے۔ اس کے بعد موسم کی سمت مکمل طور پر بدل جائے گی اور شمال مشرقی ہوائیں چلنے لگیں گی، جس سے رات کا درجہ حرارت تیزی سے گرے گا۔ پانچ سے 13 نومبر تک مشرقی مدھیہ پردیش میں بارش کا امکان نہیں ہے، لیکن سردی میں اضافہ جاری رہے گا۔

مجموعی طور پر نومبر کا آغاز مدھیہ پردیش میں بارش اور سردی دونوں کے امتزاج کے ساتھ ہو رہا ہے۔ جہاں ایک طرف مانسون کی وداعی کے باوجود اکتوبر میں ریکارڈ بارش درج کی گئی، وہیں نومبر کے پہلے ہفتے میں بارش کا دور جاری رہے گا۔ دوسرے ہفتے سے موسم میں سردی کا اثر بڑھ جائے گا۔ موسم ماہرین کے مطابق، یہ پیٹرن گزشتہ کئی سالوں سے جاری ہے اور اس بار بھی ریاست میں بارش کے بعد سخت سردی کی آمد متوقع ہے۔

ہندوستھان سماچار

--------------

ہندوستان سماچار / انظر حسن