کولکاتہ،یکم نومبر (ہ س):۔

الیکشن کمیشن (ای سی) نے ہفتہ کو مغربی بنگال میں ووٹر لسٹوں کی خصوصی نظر ثانی (ایس آئی آر) کے لئے بوتھ لیول آفیسرز (بی ایل اوز) کو تربیت دینا شروع کی۔ یہ ٹریننگ مختلف اضلاع میں جاری ہے اور 3 نومبر تک مکمل ہو جائے گی۔ اس کے بعد ایس آئی آر کا عمل 4 نومبر سے 4 دسمبر تک چلے گا۔

بھوانی پور، راس بہاری، بالی گنج، ٹولی گنج، قصبہ ، جاد و پور، میٹیابرج، بہلا ایسٹ، اور بہلا ویسٹ اسمبلی حلقوں کے بی ایل اوز کے لیے جنوبی کولکاتہ کے نذرل منچ میں تربیت کے بیچ کا انعقاد کیا گیا۔

الیکشن کمیشن نے بی ایل اوز کے لیے 16 نکاتی رہنما خطوط جاری کیے ہیں اور فیلڈ آپریشنز کی سہولت کے لیے ایک نئی موبائل ایپ دستیاب کرائی ہے۔ تربیت کے دوران بی ایل اوز کو خصوصی کٹس اور ضروری دستاویزات فراہم کی گئیں۔ مقررہ مدت کے دوران، بی ایل او گھر گھر جا کر ووٹر کی تصدیق اور فارم بھریں گے۔ اس وقت کے دوران، بی ایل او نئے ووٹرز کو شامل کرنے، فوت شدہ یا دوسری جگہ منتقل ہونے والے ووٹرز کے ناموں کو ہٹانے اور دستاویزات کو اپ ڈیٹ کرنے کے ذمہ دار ہوں گے۔ تاہم بعض بی ایل اوز نے سیکورٹی کے حوالے سے خدشات کا اظہار کیا ہے۔ ٹریننگ میں شریک ایک بی ایل او نے کہا کہ ہمیں نچلی سطح پر کام کرنا ہے اس لیے سیکیورٹی کے حوالے سے خدشات فطری ہیں۔

ایک اور بی ایل او نے کہا کہ اگرچہ گزشتہ انتخابات میں خطرناک واقعات دیکھنے میں آئے ہیں لیکن پھر بھی ہمیں اپنا کام بغیر کسی خوف کے، قواعد کے مطابق کرنا ہے۔

ہندوستھان سماچار

ہندوستان سماچار / عطاءاللہ